1979ஆம் ஆண்டு இயற்றப்பட்ட பயங்கரவாதத் தடுப்பு (தற்காலிக ஏற்பாடுகள்) சட்டத்தை (PTA) நீக்கி, அதற்குப் பதிலாக ‘Protection of the State from Terrorism Bill’ எனும் புதிய சட்டமூலத்தை அரசாங்கம் வர்த்தமானியில் வெளியிட்டுள்ளது.
செப்டம்பர் 18ஆம் திகதியிட்ட வர்த்தமானி இணைப்பிதழில் வெளியிடப்பட்ட இந்தச் சட்டமூலம், செப்டம்பர் 22ஆம் திகதி பொதுமக்களுக்கு வெளியிடப்பட்டது.
இலங்கையின் தேசிய பாதுகாப்பையும், நாட்டுக்குள் அல்லது நாட்டிற்கு வெளியே இடம்பெறும் பயங்கரவாதச் செயல்களிலிருந்து பொதுமக்களையும் பாதுகாப்பது இந்தச் சட்டமூலத்தின் முக்கிய நோக்கங்களில் ஒன்றாகக் குறிப்பிடப்பட்டுள்ளது.
மேலும், வெளிநாடுகளில் பயங்கரவாத நடவடிக்கைகளைத் தயாரிப்பதற்காக இலங்கைப் பிரதேசம் பயன்படுத்தப்படுவதைத் தடுப்பது, பயங்கரவாதக் குற்றங்களுடன் தொடர்புடையவர்களை அடையாளம் காணுதல், கைது செய்தல், தடுத்து வைத்தல், விசாரணை செய்தல், வழக்குத் தொடருதல் மற்றும் தண்டனை வழங்குதல் ஆகியவற்றுக்கான சட்ட ஏற்பாடுகளை உருவாக்குவதும் இதன் நோக்கங்களாக குறிப்பிடப்பட்டுள்ளன.
பயங்கரவாதம் தொடர்பான வரையறை
பொதுமக்களிடையே அச்சத்தை ஏற்படுத்தும் நோக்கத்துடன் அல்லது அரசாங்கம் அல்லது சர்வதேச அமைப்பு ஒன்றை குறிப்பிட்ட நடவடிக்கையை மேற்கொள்ளவோ அல்லது மேற்கொள்ளாமல் இருக்கவோ நிர்ப்பந்திக்கும் நோக்கத்துடன், அரசியல் அல்லது கருத்தியல் இலக்கை முன்னெடுப்பதற்காக திட்டமிட்டு மேற்கொள்ளப்படும் செயல்கள் பயங்கரவாதமாக சட்டமூலத்தில் வரையறுக்கப்பட்டுள்ளன.
மரணம் அல்லது கடுமையான காயங்களை ஏற்படுத்துதல், பணயக்கைதிகளை பிடித்தல், பொது உட்கட்டமைப்புகளுக்கு பாரிய சேதம் ஏற்படுத்துதல், சுற்றுச்சூழலுக்கு பாரிய பாதிப்பு ஏற்படுத்துதல், முக்கியமான கணினி அமைப்புகள் மீது சைபர் தாக்குதல்கள் நடத்துதல் உள்ளிட்ட செயல்களும் இதில் உள்ளடக்கப்பட்டுள்ளன.
பயங்கரவாதச் செயற்பாட்டின் விளைவாக ஒருவர் உயிரிழந்தால், குற்றவாளிக்கு ஆயுள் தண்டனை விதிக்கப்படலாம். ஏனைய பயங்கரவாதக் குற்றங்களுக்கு 20 ஆண்டுகள் வரையான சிறைத்தண்டனையும் 20 மில்லியன் ரூபாய் வரையான அபராதமும் விதிக்கப்படலாம்.
பயங்கரவாதச் செயல்களை மேற்கொள்ள முயற்சித்தல், சதி செய்தல் மற்றும் அதற்கான தயாரிப்புகளில் ஈடுபடுதல் ஆகியவையும் குற்றங்களாக குறிப்பிடப்பட்டுள்ளன.
தடைசெய்யப்பட்ட அமைப்புகளில் ஆட்சேர்ப்பு, நிதியுதவி, பயிற்சி, தளவாட உதவி அல்லது செயற்பாடுகளில் பங்கேற்பு உள்ளிட்ட நடவடிக்கைகளுக்கு 15 ஆண்டுகள் வரையான சிறைத்தண்டனையும் 15 மில்லியன் ரூபாய் வரையான அபராதமும் விதிக்கப்படலாம்.
போராட்டங்கள் மற்றும் கருத்துச் சுதந்திரத்திற்கு பாதுகாப்பு
அதேவேளை, சட்டமூலம் சில அடிப்படை உரிமைகளுக்கான பாதுகாப்புகளையும் உள்ளடக்கியுள்ளது.
போராட்டங்கள், வேலைநிறுத்தங்கள், தொழிற்சங்க நடவடிக்கைகள், பிரசாரம், கருத்து வேறுபாடு மற்றும் மனிதாபிமான நடவடிக்கைகளில் பங்கேற்பது மட்டும் பயங்கரவாதக் குற்றமாக கருதப்படாது என சட்டமூலம் குறிப்பிடுகிறது.
மேலும், ஊடகவியல், கல்வி மற்றும் விஞ்ஞான ஆய்வுகள், சிவில் சமூக நடவடிக்கைகள், சட்டப் பிரதிநிதித்துவம், கலை வெளிப்பாடு, நையாண்டி, அரசியல் விமர்சனம் மற்றும் அமைதியான முறையில் கருத்து அல்லது எதிர்ப்பை வெளிப்படுத்துதல் ஆகியவற்றுக்கும் பாதுகாப்பு வழங்கப்பட்டுள்ளது.
எனினும், இத்தகைய நடவடிக்கைகள் திட்டமிட்டு பயங்கரவாதத்தைத் தூண்டுவதாக அமையக்கூடாது என சட்டமூலம் குறிப்பிடுகிறது.
கைது மற்றும் தடுப்புக்காவல்
கைது செய்யப்படும் சந்தேகநபருக்கு கைது செய்யப்பட்டதற்கான காரணங்களும், சட்டத்தரணியின் உதவியைப் பெறுவதற்கான உரிமையும் தெரிவிக்கப்பட வேண்டும்.
கைது தொடர்பான தகவல் சந்தேகநபரின் நெருங்கிய உறவினர்களுக்கும் இலங்கை மனித உரிமைகள் ஆணைக்குழுவுக்கும் வழங்கப்பட வேண்டும்.
பொதுவாக, கைது செய்யப்பட்ட 48 மணி நேரத்துக்குள் சந்தேகநபர் நீதவான் முன்னிலையில் ஆஜர்படுத்தப்பட வேண்டும்.
எனினும், விசாரணைகளுக்காக மேலதிக தடுப்புக்காவல் அவசியம் எனக் கருதப்பட்டால், பொலிஸ் மா அதிபர் அல்லது அதிகாரமளிக்கப்பட்ட பிரதி பொலிஸ் மா அதிபரின் விண்ணப்பத்தின் பேரில் சம்பந்தப்பட்ட அமைச்சின் செயலாளர் தடுப்புக்காவல் உத்தரவை பிறப்பிக்க முடியும்.
ஒவ்வொரு தடுப்புக்காவல் உத்தரவும் ஒரே நேரத்தில் அதிகபட்சம் இரண்டு மாதங்கள் வரை அமுலில் இருக்க முடியும். ஆரம்ப தடுப்புக்காவல் உத்தரவு பிறப்பிக்கப்பட்ட நாளிலிருந்து மொத்த தடுப்புக்காவல் காலம் ஒரு வருடத்தை கடக்கக்கூடாது.
இரண்டு மாதங்களுக்கு மேலாக தடுப்புக்காவலை நீடிப்பதற்கு உயர் நீதிமன்றத்தின் அனுமதி தேவைப்படும்.
சுயாதீன மீளாய்வுக் குழு
தடுப்புக்காவல் உத்தரவுகளை மீளாய்வு செய்வதற்காக சுயாதீன மீளாய்வுக் குழு ஒன்றை அமைக்கவும் சட்டமூலம் முன்மொழிகிறது.
ஓய்வுபெற்ற உயர் நீதிமன்ற அல்லது மேன்முறையீட்டு நீதிமன்ற நீதிபதி ஒருவரும், சட்டம், மனித உரிமைகள், பொது நிர்வாகம் அல்லது தேசிய பாதுகாப்பு துறைகளில் நிபுணத்துவம் கொண்ட மேலும் இருவரும் இந்தக் குழுவில் இடம்பெறுவர்.
தடுப்புக்காவல் உத்தரவுகளை தொடர வேண்டுமா, திருத்த வேண்டுமா அல்லது இரத்துச் செய்ய வேண்டுமா என்பது தொடர்பில் குழு பரிந்துரைகளை வழங்கும்.
நீதவான்களின் காலமுறை கண்காணிப்பு, மனித உரிமைகள் ஆணைக்குழுவின் அதிகாரிகளால் தடுப்புக்காவல் நிலையங்களைப் பரிசோதித்தல் மற்றும் சித்திரவதை அல்லது கொடூரமான, மனிதாபிமானமற்ற அல்லது இழிவான நடத்தைகள் இடம்பெற்றதாக சந்தேகிக்கப்படும் சந்தர்ப்பங்களில் மருத்துவப் பரிசோதனைகள் உள்ளிட்ட கண்காணிப்பு ஏற்பாடுகளும் சட்டமூலத்தில் உள்ளடக்கப்பட்டுள்ளன.
சட்டமூலம் நிறைவேற்றப்பட்டால், நீண்டகாலமாக நடைமுறையில் உள்ள PTA சட்டத்திற்குப் பதிலாக, பயங்கரவாதக் குற்றங்கள், விசாரணைகள், தடுப்புக்காவல் நடைமுறைகள், நீதித்துறை கண்காணிப்பு மற்றும் சந்தேகநபர்களுக்கான பாதுகாப்புகள் தொடர்பான புதிய சட்டக் கட்டமைப்பு அமுலுக்கு வரும்.
வர்த்தமானி: https://www.newswire.lk/wp-
