பாகிஸ்தானில் நடைபெற்று வரும் மும்முனை ஒருநாள் சர்வதேச கிரிக்கெட் தொடரின் மூன்றாவது போட்டியில், இங்கிலாந்து அணி நிர்ணயித்த 430 ஓட்டங்கள் என்ற இமாலய இலக்கைத் துரத்திப் பிடித்த இலங்கை அணி, 2 விக்கெட்டுகள் வித்தியாசத்தில் வரலாற்று வெற்றியைப் பதிவு செய்துள்ளது.
ராவல்பிண்டியில் நடைபெற்ற இப்போட்டியில் நாணயச் சுழற்சியில் வெற்றி பெற்ற இங்கிலாந்து அணி முதலில் துடுப்பெடுத்தாடத் தீர்மானித்தது.இதன்படி, நிர்ணயிக்கப்பட்ட 50 ஓவர்களில் 4 விக்கெட்டுகளை இழந்த இங்கிலாந்து அணி 429 ஓட்டங்களைக் குவித்தது.
இங்கிலாந்து அணியின் சார்பில் அணித்தலைவர் ஹரி புரூக் 116 பந்துகளில் 202 ஓட்டங்களைக் குவித்து அதிரடி காட்டினார். வில் ஜாக்ஸ் 30 பந்துகளில் ஆட்டமிழக்காமல் 66 ஓட்டங்களையும், ஜோ ரூட் 69 ஓட்டங்களையும் பெற்றனர்.
இலங்கை அணியின் பந்துவீச்சில் துனித் வெல்லாலகே 56 ஓட்டங்களுக்கு 2 விக்கெட்டுகளை வீழ்த்தினார்.
430 ஓட்டங்கள் என்ற கடினமான வெற்றியிலக்கை நோக்கிப் பதிலுக்குத் துடுப்பெடுத்தாடிய இலங்கை அணி, ஆரம்பத்திலேயே குசல் மெண்டிஸ் ஓட்டமின்றியும், கமிந்து மெண்டிஸ் 18 ஓட்டங்களுடனும் ஆட்டமிழந்ததால் நெருக்கடியை எதிர்கொண்டது.
எனினும், பவன் ரத்நாயக்க மற்றும் அவிஷ்க பெர்னாண்டோ ஆகியோரின் சிறப்பான துடுப்பாட்டம் இலங்கை அணியின் வெற்றி வாய்ப்பை அதிகரித்தது.பவன் ரத்நாயக்க 106 பந்துகளில் 130 ஓட்டங்களையும், அவிஷ்க பெர்னாண்டோ 83 பந்துகளில் 97 ஓட்டங்களையும் பெற்று அணிக்கு வலுச்சேர்த்தனர்.
தொடர்ந்து துடுப்பெடுத்தாடிய தசுன் ஷானக்க 50 பந்துகளில் 97 ஓட்டங்களைக் குவித்து ஆட்டமிழந்தார்.
இறுதி ஓவர்களில் அதிரடியாக விளையாடிய ஜனித் லியனகே, வெறும் 27 பந்துகளில் 7 பவுண்டரிகள் மற்றும் 3 சிக்ஸர்களுடன் ஆட்டமிழக்காமல் 61 ஓட்டங்களைப் பெற்று இலங்கை அணியின் வெற்றியை உறுதிப்படுத்தினார்.
இதன்படி, 49.5 ஓவர்களில் 8 விக்கெட்டுகளை இழந்து 430 ஓட்டங்களைப் பெற்ற இலங்கை அணி, ஒரு பந்து மீதமிருக்கையில் 2 விக்கெட்டுகள் வித்தியாசத்தில் அபார வெற்றியைப் பதிவு செய்தது.
இங்கிலாந்து அணியின் பந்துவீச்சில் ஜோஷ் டங் 3 விக்கெட்டுகளையும், சாம் கரன் 2 விக்கெட்டுகளையும் வீழ்த்தினர்.
ஒருநாள் கிரிக்கெட் வரலாற்றில் இரண்டாவது மிகப்பெரிய இலக்குத் துரத்தல்
இப்போட்டியில் இலங்கை அணி பதிவு செய்த வெற்றியானது, ஒருநாள் சர்வதேச கிரிக்கெட் வரலாற்றில் வெற்றிகரமாகத் துரத்திப் பிடிக்கப்பட்ட இரண்டாவது அதிகூடிய இலக்காகும்.
இதற்கு முன்னதாக, 2006ஆம் ஆண்டு ஜோகன்னஸ்பேர்க்கில் அவுஸ்திரேலிய அணிக்கு எதிராக நடைபெற்ற போட்டியில், 434 ஓட்டங்கள் என்ற இலக்கைத் தென்னாபிரிக்க அணி வெற்றிகரமாகத் துரத்திப் பிடித்திருந்தது. அந்தப் போட்டியில் தென்னாபிரிக்க அணி 9 விக்கெட்டுகளை இழந்து 438 ஓட்டங்களைப் பெற்று வெற்றி பெற்றமை குறிப்பிடத்தக்கது.
