நேபாளத்துக்கு விரைவாக நிவாரண உதவிகளை வழங்கிய இந்தியா!

அமெரிக்கா, சீனா உள்ளிட்ட பல நாடுகள் நேபாளத்துக்கு உதவிகளை வழங்க உறுதியளித்துள்ள நிலையில், உதவிகளை விரைவாக வழங்கியதில் இந்தியா தனித்து நிற்கிறது.

புதன்கிழமை இரவு சுமார் 8.35 மணியளவில், இந்திய விமானப்படையின் C-130J ரக விமானம், 10 தொன் மனிதாபிமான மற்றும் பேரிடர் நிவாரண உதவிப் பொருட்களுடன் நேபாளத்தை நோக்கிப் புறப்பட்டது. சுற்றுச்சூழல் ரீதியாக மிகவும் பாதிக்கப்படக்கூடிய இமயமலை நாடான நேபாளம் உயிரிழப்புகளை ஏற்படுத்திய திடீர் வெள்ளத்தால் பாதிக்கப்பட்டு 12 மணி நேரத்துக்கும் குறைவான காலத்திலேயே இந்த விமானம் புறப்பட்டது. முதல் தொகுதி நிவாரணப் பொருட்கள் அன்றிரவே காத்மாண்டுவைச் சென்றடைந்தன.

இந்தியாவின் விரைவான நடவடிக்கை, மனிதாபிமான மற்றும் பேரிடர் நிவாரணப் பணிகளில் அந்நாட்டின் அதிகரித்து வரும் பங்களிப்பின் ஒரு பரந்த போக்குடன் இணைந்துள்ளது.

இந்த உடனடி நடவடிக்கை, இந்தியா ஒரு “முதன்மை உதவியாளர்” (first responder) என்ற நிலையை மேலும் வலுப்படுத்துகிறது. சீனா, அமெரிக்கா உள்ளிட்ட பல நாடுகளும் சர்வதேச அமைப்புகளும் உதவிகளைத் திரட்டிக் கொண்டிருந்த நிலையில், இந்தியா தனது இமயமலை அண்டை நாடான நேபாளத்துக்கு நிவாரணப் பொருட்களை நேரடியாகவும் விரைவாகவும் வழங்கியுள்ளது.

கொவிட்-19 தடுப்பூசிகளை ஆப்பிரிக்கா உள்ளிட்ட பல நாடுகளுக்கு வழங்கியது முதல், 2023ஆம் ஆண்டு நிலநடுக்கத்தால் பாதிக்கப்பட்ட துருக்கி மற்றும் சிரியாவில் மேற்கொண்ட மீட்பு மற்றும் நிவாரண நடவடிக்கைகள், 2024ஆம் ஆண்டு பேரிடரால் பாதிக்கப்பட்ட மியான்மரில் மேற்கொண்ட நடவடிக்கைகள், 2025ஆம் ஆண்டு சூறாவளியால் பாதிக்கப்பட்ட இலங்கையில் மேற்கொண்ட நடவடிக்கைகள், 2026ஆம் ஆண்டு நிலநடுக்கத்தால் பாதிக்கப்பட்ட வெனிசுலாவில் மேற்கொண்ட நடவடிக்கைகள் என இந்தியாவின் மனிதாபிமான மற்றும் பேரிடர் நிவாரண முயற்சிகள் தொடர்ந்து விரிவடைந்து வருகின்றன.

புதன்கிழமை மாலை, இந்தியப் பிரதமர் நரேந்திர மோடி, நேபாளப் பிரதமர் பாலேந்திர ஷாவுடன் தொலைபேசியில் உரையாடி, உயிரிழந்தவர்களுக்கு இரங்கல் தெரிவித்தார். நேபாளத்துக்கு தேவையான அனைத்து மனிதாபிமான உதவிகளையும் வழங்க இந்தியா தயாராக இருப்பதாகவும் அவர் தெரிவித்தார். மீட்பு மற்றும் நிவாரணப் பணிகளில் இந்தியக் குழுக்கள் நெருக்கமாக ஒருங்கிணைந்து செயல்பட்டு வருவதாகவும் அவர் கூறினார்.

முதல் விமானம் அனுப்பப்பட்டபோது, இந்திய வெளியுறவுத்துறை அமைச்சர் எஸ். ஜெய்சங்கர், நேபாளத்துக்கு 10 தொன் மனிதாபிமான உதவிகள் அனுப்பப்பட்டுள்ளதாக எக்ஸ் தளத்தில் பதிவிட்டார். “இந்தியாவும் அதன் மக்களும் நேபாளத்துடன் நிற்கின்றனர்” என்றும் அவர் தெரிவித்தார்.

இதனிடையே, ஏனைய சர்வதேச நாடுகளும் நேபாளத்துக்கு உதவிகளை வழங்க உறுதியளித்துள்ளன அல்லது உதவிகளைத் தொடங்கியுள்ளன.

நேபாளத்தில் செல்வாக்கைப் பெறுவதற்காக வரலாற்று ரீதியாக இந்தியாவுடன் போட்டியிட்டு வரும் சீனா, அவசரகால நிவாரணப் பொருட்கள் மற்றும் நிதியுதவியை வழங்க நடவடிக்கை எடுத்துள்ளதாக நேபாளத்துக்கான சீனத் தூதுவர் தெரிவித்துள்ளார். எனினும், நிதியைப் பரிமாற்றுவதற்கும் நிவாரணப் பொருட்களை வழங்குவதற்குமான முறையான ஏற்பாடுகள் இன்னும் இறுதி செய்யப்படவில்லை என உள்ளூர் ஊடகங்கள் தெரிவித்துள்ளன.

தென் கொரியா, ஐக்கிய இராச்சியம், ஐரோப்பிய ஒன்றியம், அமெரிக்கா, ஐக்கிய நாடுகள் சபை, உலக சுகாதார அமைப்பு மற்றும் உலக வங்கி ஆகியவையும் பல்வேறு வகையான உதவிகளை வழங்க முன்வந்துள்ளன அல்லது அவற்றைத் திரட்டியுள்ளன.

அமெரிக்கா 500,000 அமெரிக்க டொலர் மற்றும் பேரிடர் மீட்பு ஆலோசகர் ஒருவரை வழங்க உறுதியளித்துள்ளது. ஐக்கிய இராச்சியம் 5 மில்லியன் பவுண்டுகள் (6.79 மில்லியன் அமெரிக்க டொலர்) மற்றும் அவசரகால மீட்புப் பணியாளர்களை வழங்க உறுதியளித்துள்ளது. உலக வங்கி, அவசரகால உதவியாக 25 பில்லியன் நேபாள ரூபாய் (163.55 மில்லியன் அமெரிக்க டொலர்) வரை வழங்க முடியும் என தெரிவித்துள்ளது.

எனினும், இந்தியாவின் நடவடிக்கையில் குறிப்பிடத்தக்க அம்சம் அதன் நேரடி நிவாரண உதவிகள் வழங்கப்பட்ட வேகம் ஆகும்.

வியாழக்கிழமை, மருந்துகள் மற்றும் உணவுப் பொதிகள் உள்ளிட்ட இரண்டாவது தொகுதி நிவாரணப் பொருட்களை இந்தியா அனுப்பியது. இதன் மூலம் விமானம் மூலம் வழங்கப்பட்ட மொத்த நிவாரணப் பொருட்களின் அளவு 47.5 தொன்களாக அதிகரித்தது.

வெள்ளிக்கிழமை பிற்பகல் நிலவரப்படி, இந்தியா மொத்தமாக 62 தொன் நிவாரணப் பொருட்களை நேபாளத்துக்கு அனுப்பியுள்ளது.

ஆகஸ்ட் 26ஆம் தேதி நேபாளம்–திபெத் எல்லைப் பகுதியில் ஏற்பட்ட இந்தப் பேரழிவு, மிகப்பெரிய பனிப்பாறைச் சரிவினால் ஏற்பட்டிருக்கலாம் என நம்பப்படுகிறது. இதனால் பனி, பாறைகள், சேறு மற்றும் நீர் ஆகியவை மலைப் பகுதிகளிலுள்ள ஆறுகளில் பெருக்கெடுத்து ஓடி, கிராமங்களை அழித்ததுடன், வீதிகள், பாலங்கள் உள்ளிட்ட பிற உட்கட்டமைப்புகளையும் அடித்துச் சென்றன.

செயற்கைக்கோள் படங்கள் மற்றும் புவியியல் ஆய்வுகள் இந்தப் பேரழிவு நிகழ்ந்த தொடர் சம்பவங்கள் குறித்து மேலதிக தகவல்களை வழங்கியுள்ளன. எனினும், இந்தப் பேரழிவுக்கு என்ன காரணம் என்பதை விஞ்ஞானிகள் தொடர்ந்து ஆய்வு செய்து வருகின்றனர்.

வெள்ளிக்கிழமை பிற்பகல் நிலவரப்படி, நேபாளத்தில் 469 பேரும் திபெத்தில் 3 பேரும் உயிரிழந்துள்ளனர். இதன்படி, எல்லைப் பகுதிகளில் உயிரிழந்தவர்களின் மொத்த எண்ணிக்கை 472 ஆக உயர்ந்துள்ளது.

மேலும், நேபாளத்தில் சுமார் 1,000 பேர் காணாமல் போயுள்ளதாகவும், திபெத்தில் 558 பேர் தொடர்பில் தகவல் கிடைக்கவில்லை என்றும் தெரிவிக்கப்பட்டுள்ளது.