1,056 புதிய குடும்ப சுகாதார சேவை உத்தியோகத்தர்களுக்கான நியமனக் கடிதங்கள் வழங்கும் விசேட நிகழ்வு, சுகாதார மற்றும் ஊடகத்துறை அமைச்சர் வைத்தியர் நளிந்த ஜயதிஸ்ஸ தலைமையில் எதிர்வரும் ஒக்டோபர் 04ஆம் திகதி அலரி மாளிகை வளாகத்தில் நடைபெறவுள்ளது.
ஒன்றரை ஆண்டுகால முறையானதும் விரிவானதுமான பயிற்சியை வெற்றிகரமாக நிறைவு செய்த பின்னர் குறித்த உத்தியோகத்தர்களுக்கு இந்த நியமனங்கள் வழங்கப்படுகின்றன.
இவர்கள் நாடளாவிய ரீதியில் மாகாண சபைகளின் கீழுள்ள வைத்தியசாலைகள் மற்றும் சுகாதார நிறுவனங்களிலும், மத்திய அரசின் கீழுள்ள சுகாதார நிறுவனங்களிலும் பணிக்கு இணைக்கப்படவுள்ளனர்.
குடும்ப சுகாதார சேவை உத்தியோகத்தர்கள், தாய் மற்றும் குழந்தை நலப் பராமரிப்பு உள்ளிட்ட சமூக சுகாதார சேவைகளில் முக்கிய பங்காற்றுகின்றனர்.
மக்களுக்கு அருகாமையில் தொடர்ச்சியான சுகாதார சேவைகளை வழங்குவதில் இவர்களின் பணி முக்கியத்துவம் வாய்ந்ததாகக் கருதப்படுகிறது.
புதிதாக 1,056 உத்தியோகத்தர்கள் சேவையில் இணைத்துக்கொள்ளப்படுவது, நாட்டின் சுகாதாரத் துறையை மேலும் வலுப்படுத்துவதற்கு குறிப்பிடத்தக்க பங்களிப்பை வழங்கும் என எதிர்பார்க்கப்படுகிறது.
