இஸ்ரேலின் டெல் அவிவ் நகரிலிருந்து ஒஸ்திரியத் தலைநகர் வியன்னா நோக்கிப் பயணித்த ஒஸ்திரியன் எயார்லைன்ஸ் நிறுவனத்துக்குச் சொந்தமான பயணிகள் விமானம், வெடிகுண்டு மிரட்டல் விடுக்கப்பட்டதைத் தொடர்ந்து பல்கேரியத் தலைநகர் சோஃபியாவில் அவசரமாகத் தரையிறக்கப்பட்டுள்ளது.
பல்கேரிய போக்குவரத்து அமைச்சை மேற்கோள்காட்டி சர்வதேச ஊடகங்கள் இந்தச் செய்தியை வெளியிட்டுள்ளன.
51 பயணிகள் மற்றும் 6 விமானப் பணியாளர்கள் என மொத்தம் 57 பேருடன் பயணித்த எயார்பஸ் ஏ320 ரக விமானம், டெல் அவிவிலிருந்து மாலை 6.40 மணியளவில் வியன்னா நோக்கிப் புறப்பட்டது.
ரோமானிய எல்லைக்கு அருகிலுள்ள வான்பரப்பில் விமானம் பறந்துகொண்டிருந்தபோது, வெடிகுண்டு அச்சுறுத்தல் தொடர்பான எச்சரிக்கை கிடைத்ததைத் தொடர்ந்து, விமானத்தைச் சோஃபியாவுக்குத் திருப்புவதற்கு முடிவெடுக்கப்பட்டது.
இதனையடுத்து, பல்கேரிய விமானப் படையின் போர் விமானம் ஒன்று குறித்த பயணிகள் விமானத்தைப் பாதுகாப்பாகச் சோஃபியா விமான நிலையத்துக்கு வழிநடத்தியது.
இரவு 9.25 மணியளவில் விமானம் சோஃபியாவில் பாதுகாப்பாகத் தரையிறக்கப்பட்டதைத் தொடர்ந்து, அதிலிருந்த பயணிகள் அனைவரும் வெளியேற்றப்பட்டு பாதுகாப்பான இடங்களுக்கு அழைத்துச் செல்லப்பட்டனர்.
இந்தச் சம்பவம் தொடர்பில் மேலதிக விசாரணைகள் முன்னெடுக்கப்பட்டு வருகின்றன.
