மொராக்கோவில் பாலஸ்தீன ஆதரவு போராட்டங்கள் தீவிரம்; இஸ்ரேலுடனான உறவுக்கு எதிர்ப்பு!

அப்ரா அன்சார்

கொழும்பு: இஸ்ரேலுடனான இராஜதந்திர உறவுகளை மொராக்கோ மேலும் வலுப்படுத்தி வரும் நிலையில், அதற்கு எதிராகவும் பாலஸ்தீனத்திற்கு ஆதரவாகவும் மொராக்கோவின் பல நகரங்களில் போராட்டங்கள் இடம்பெற்றுள்ளன.

செப்டெம்பர் 27ஆம் திகதி, பாலஸ்தீன ஆதரவு மற்றும் இஸ்ரேலுடனான உறவுகளை இயல்பாக்குவதற்கு எதிரான மொராக்கோ முன்னணியினால் முன்னெடுக்கப்பட்ட மூன்று நாள் போராட்டங்களின் நிறைவாக பல்வேறு நகரங்களில் ஆர்ப்பாட்டங்கள் நடத்தப்பட்டன.

செப்டெம்பர் 16ஆம் திகதி மொராக்கோவும் இஸ்ரேலும் தங்களது இராஜதந்திரப் பிரதிநிதித்துவங்களை முழுமையான தூதரகங்களாக தரம் உயர்த்தி, தூதர்களை நியமிக்க தீர்மானித்ததாக அறிவித்திருந்தன.

இதற்கு எதிராக செப்டெம்பர் 25ஆம் திகதி, மொராக்கோவின் தேசியப் பிரச்சினைகளுக்கு ஆதரவான குழு, 45 நகரங்களில் 76 நிகழ்வுகளை ஏற்பாடு செய்ததாக தெரிவித்தது.

ரபாத், காசாபிளாங்கா, மராகெஷ், டாங்கியர், ஃபெஸ், அகாதிர், ஒஜ்டா, டெட்டுவான், கெனித்ரா மற்றும் சலே உள்ளிட்ட நகரங்களில் போராட்டங்கள் இடம்பெற்றதாக மொராக்கோ ஊடகங்கள் செய்தி வெளியிட்டுள்ளன.

ரபாதில் நாடாளுமன்றத்திற்கு வெளியே போராட்டக்காரர்கள் ஒன்றுகூடியதுடன், மராகெஷில் இடம்பெற்ற போராட்டம் முக்கிய வீதிகள் வழியாக பேரணியாக முன்னெடுக்கப்பட்டதாக தெரிவிக்கப்பட்டுள்ளது.

சில நகரங்களில் போராட்டங்களுக்கு கட்டுப்பாடுகள் விதிக்கப்பட்டதுடன், கைது நடவடிக்கைகளும் இடம்பெற்றதாக உள்ளூர் ஊடகங்கள் தெரிவித்துள்ளன.

டாங்கியரில் செப்டெம்பர் 27ஆம் திகதி நடத்த திட்டமிடப்பட்டிருந்த ஆர்ப்பாட்டத்திற்கு உள்ளூர் அதிகாரிகள் தடை விதித்ததாகவும், பின்னர் பாதுகாப்புப் படையினர் நூற்றுக்கணக்கான போராட்டக்காரர்களைக் கலைத்ததுடன், 12க்கும் மேற்பட்டோர் கைது செய்யப்பட்டதாகவும் Achkayen செய்தி வெளியிட்டுள்ளது.

மொராக்கோ 2020ஆம் ஆண்டு டிசெம்பர் மாதம் அமெரிக்காவின் மத்தியஸ்தத்தில் ஏற்படுத்தப்பட்ட ஆபிரகாம் உடன்படிக்கை கட்டமைப்பின் கீழ் இஸ்ரேலுடனான இராஜதந்திர உறவுகளை மீள ஏற்படுத்தியது.

அதேவேளை, செப்டெம்பர் 16ஆம் திகதி நியூயோர்க்கில் மொராக்கோ வெளிவிவகார அமைச்சர் நாசர் புரிட்டா மற்றும் இஸ்ரேலிய வெளிவிவகார அமைச்சர் கிடியோன் சார் சந்தித்திருந்தனர்.

இதன்போது இரு நாடுகளின் இராஜதந்திரப் பிரதிநிதித்துவங்களை முழுமையான தூதரகங்களாக தரம் உயர்த்துவதுடன், தூதர்களை பரிமாறிக்கொள்வதற்கும் இணக்கம் காணப்பட்டது.

மேலும், முதலீட்டுப் பாதுகாப்பு, இரட்டை வரிவிதிப்பைத் தவிர்த்தல், நேரடி விமான சேவைகளை விரிவுபடுத்துதல் மற்றும் உயர்மட்ட பரஸ்பர விஜயங்களை மேற்கொள்ளுதல் உள்ளிட்ட விடயங்களிலும் இரு நாடுகளும் இணக்கம் தெரிவித்துள்ளன.

இந்நிலையில், மொராக்கோ அரசாங்கம் இஸ்ரேலுடனான உறவுகளை வலுப்படுத்தி வரும் நிலையில், பாலஸ்தீனத்திற்கு ஆதரவான போராட்டங்களும் தொடர்ந்து இடம்பெற்று வருகின்றன.

அண்மைய அரபு கருத்துக்கணிப்பு சுட்டெண் தொடர்பாக கருத்து தெரிவித்த மொராக்கோ செயற்பாட்டாளர் மூனா ரஹியானி, கணக்கெடுக்கப்பட்ட மொராக்கோ மக்களில் 89 சதவீதம் பேர் இஸ்ரேலை அங்கீகரிப்பதற்கு எதிர்ப்பு தெரிவித்ததாகவும், 6 சதவீதம் பேர் ஆதரவளித்ததாகவும் குறிப்பிட்டுள்ளார்.

எவ்வாறாயினும், மொராக்கோவில் இஸ்ரேலுடனான உறவுகளை ஆதரிப்போர் அல்லது எதிர்ப்போரின் எண்ணிக்கையை துல்லியமாக நிர்ணயிக்க போதுமான நம்பகமான பொதுத் தரவுகள் இல்லை என அரபு ஆய்வு மையத்தின் காத்யா கே. பெராடா தெரிவித்துள்ளார்.

இதேவேளை, மொராக்கோவின் மேற்கு சஹாரா கொள்கையும் இஸ்ரேல் மற்றும் அமெரிக்காவுடனான அதன் உறவுகளுடன் தொடர்புடைய மற்றொரு முக்கிய விடயமாக உள்ளது.

ஐக்கிய நாடுகள் பாதுகாப்புச் சபை, மேற்கு சஹாராவுக்கான ஐ.நா. மக்கள் வாக்கெடுப்பு பணிக்குழுவான MINURSO-வின் ஆணையை ஒக்டோபர் மாதத்தில் பரிசீலிக்கவுள்ளது.

மொராக்கோவில் செப்டெம்பர் 23ஆம் திகதி நாடாளுமன்றத் தேர்தல் இடம்பெற்ற சில நாட்களுக்குப் பின்னரே இந்தப் போராட்டங்கள் இடம்பெற்றுள்ளன.

தேர்தல் முடிவுகளின்படி, Authenticity and Modernity Party 97 ஆசனங்களையும், National Rally of Independents 66 ஆசனங்களையும், Istiqlal Party 65 ஆசனங்களையும், Justice and Development Party (PJD) 54 ஆசனங்களையும் பெற்றுள்ளன.

2021ஆம் ஆண்டு தேர்தலில் 13 ஆசனங்களை மாத்திரமே பெற்றிருந்த PJD, தற்போது 54 ஆசனங்களைப் பெற்றுள்ளது. எனினும், அக்கட்சி அடுத்த அரசாங்கத்தில் இணையாமல் நாடாளுமன்ற எதிர்க்கட்சியாக செயற்பட தீர்மானித்துள்ளது.

2020ஆம் ஆண்டு இஸ்ரேலுடனான உறவுகளை மீள ஏற்படுத்தியபோது PJD ஆட்சியில் இருந்ததுடன், அப்போதைய பிரதமர் சாதெத்தீன் எல்-ஒத்மானி மொராக்கோ, அமெரிக்கா மற்றும் இஸ்ரேல் இடையிலான கூட்டு பிரகடனத்தில் கையெழுத்திட்டிருந்தார்.

தற்போது PJD இஸ்ரேலுடனான உறவுகள் மற்றும் இயல்பாக்கல் நடவடிக்கைகளுக்கு எதிர்ப்பு தெரிவித்து வருகிறது.

எனினும், பாலஸ்தீன விவகாரம் அல்லது இஸ்ரேலுடனான உறவுகளை இயல்பாக்குவதற்கு எதிரான நிலைப்பாடு அண்மைய தேர்தல் முடிவுகளில் தீர்மானகரமான காரணியாக இருந்ததாக உறுதிப்படுத்தப்படவில்லை.

தற்போதைய நிலையில், மொராக்கோவின் பல பகுதிகளில் இஸ்ரேலுடனான உறவுகளை எதிர்க்கும் போராட்டங்கள் தொடர்ந்து முன்னெடுக்கப்படுவதுடன், மறுபுறம் அரசாங்கம் இரு நாடுகளுக்கும் இடையிலான இராஜதந்திர மற்றும் பொருளாதார உறவுகளை மேலும் விரிவுபடுத்தி வருகிறது.

மூலம்: அல்ஜசீரா