புனித மீலாதுன் நபி தினத்தை முன்னிட்டு, இலங்கையிலும் உலகெங்கிலும் வாழும் அனைத்து முஸ்லிம் சகோதர, சகோதரிகளுக்கும் எனது இதயபூர்வமான வாழ்த்துக்களையும் நல்வாழ்த்துக்களையும் தெரிவித்துக் கொள்கிறேன் என செயத் அலி ஸாஹிர் மௌலானா தெரிவித்துள்ளார்.
எங்கள் அன்பிற்கினிய நபிகள் நாயகம் முஹம்மது ﷺ அவர்களின் பிறப்பை நினைவுகூர்வது ஒரு வரலாற்றுச் சம்பவத்தை மாத்திரம் நினைவுகூர்வதல்ல. மாறாக, ரஸூலுல்லாஹ் ﷺ அவர்கள்மீது எமது அன்பை புதுப்பித்துக் கொள்வதற்கும், அவர்களின் உயரிய சுன்னாவை எமது வாழ்வில் கடைப்பிடிப்பதற்கும், மனிதகுலத்திற்கு அவர்கள் எடுத்துக்காட்டிய இரக்கம், கருணை, நீதி, மன்னிப்பு, பொறுமை, பணிவு மற்றும் அன்பு ஆகிய உயரிய பண்புகளை எமது வாழ்வில் பிரதிபலிப்பதற்குமான ஓர் அழைப்பாகும்.
அல்லாஹ் ﷻ தமது அன்பிற்குரிய தூதர் ﷺ அவர்களைப் பற்றி கூறுகின்றான்:
وَمَا أَرْسَلْنَاكَ إِلَّا رَحْمَةً لِّلْعَالَمِينَ
“உலகங்களுக்கெல்லாம் அருளாகவே உம்மை நாம் அனுப்பியுள்ளோம்.”
இறை அருளான ரஹ்மத் என்ற இந்த மகத்தான செய்தி இனம், மொழி, சமூகப் பின்னணி மற்றும் நாட்டின் எல்லைகளைத் தாண்டியது. ரஸூலுல்லாஹ் ﷺ அவர்களின் வாழ்க்கை, உண்மையான ஈமான் என்பது பிறரிடம் அன்பாக நடப்பதிலும், கொடுக்கல் வாங்கல்களில் நீதியை நிலைநாட்டுவதிலும், துன்ப நேரங்களில் மன்னிப்பதிலும், அல்லாஹ்வின் படைப்புகள் அனைத்தின்மீதும் கருணை காட்டுவதிலும் வெளிப்பட வேண்டும் என்பதை எமக்குக் கற்றுத் தருகிறது.
அமைதி மற்றும் புரிந்துணர்வுக்காக ஏங்கிக் கொண்டிருக்கும் இன்றைய உலகிற்கு, நபிகள் நாயகம் ﷺ அவர்கள் காட்டிச் சென்ற வாழ்க்கை நெறிகள் நிலையான வழிகாட்டியாக விளங்குகின்றன. வெறுப்பிலிருந்து சமரசத்திற்கும், பிளவிலிருந்து ஒற்றுமைக்கும், சகிப்பின்மையிலிருந்து புரிந்துணர்வுக்கும், மோதலிலிருந்து அமைதிக்கும் அழைத்துச் செல்லும் ஒளிமிகு பாதையை அவர்கள் எமக்குக் காட்டித் தந்துள்ளார்கள்.
ரஸூலுல்லாஹ் ﷺ அவர்களை நேசிப்பது என்பது, அவர்களின் அழகிய பண்புகளை எமது வாழ்வில் நடைமுறைப்படுத்த முயற்சிப்பதாகும் என்பதை இந்த மீலாத் நமக்கு நினைவூட்டட்டும்.
எனவே, இந்தப் புனிதமான நாளை எமது தாய்நாடான இலங்கையின் அனைத்து சமூகங்களுக்கிடையிலும் சகோதரத்துவம், குடும்பப் பண்புகள், சமூகப் பொறுப்பு, பரஸ்பர மரியாதை மற்றும் அமைதியான சகவாழ்வு ஆகியவற்றை மேலும் வலுப்படுத்தும் ஒரு வாய்ப்பாக மாற்றுவோம்.
சகல வளங்களும் நிறைந்த எமது அழகிய தீவு, நிலையான அமைதி, ஸ்திரத்தன்மை மற்றும் செழிப்புடன் விளங்கவும், நல்லிணக்கம் நிலைநிறுத்தப்பட்டு, பல்வேறு சமூகங்களுக்கிடையிலான நட்பும், சகோதரத்துவமும், புரிந்துணர்வும் நாளுக்கு நாள் மேலும் வலுப்பெறவும் வல்ல இறைவனைப் பிரார்த்திக்கிறேன்.
மேலும், எமது பிள்ளைகளுக்காகவும் இளைஞர்களுக்காகவும் பிரார்த்திப்போம். அல்லாஹ் ﷻ அவர்களை அறிவு, நேர்மை, கருணை மற்றும் மனிதகுல சேவையின் பாதையில் வழிநடத்துவானாக. இதயங்களை இணைத்து, சமூகங்களுக்கிடையே உறவுப் பாலங்களை அமைக்கும் தலைமுறையாக அவர்களை உருவாக்குவானாக.
அல்லாஹ் ﷻ எமது நாட்டிற்கு நீதியான தலைமைத்துவத்தையும், சமூக நல்லிணக்கத்தையும், பொருளாதார வளத்தையும், நிலையான அமைதியையும் அருள்வானாக.
உலகின் எங்கெங்கும் துன்புறுவோருக்கு வலிமையையும் வழிகாட்டுதலையும் அருள்வானாக. எமது பிரார்த்தனைகளையும் நற்செயல்களையும் ஏற்றுக் கொள்வானாக. எமது குறைகளை மன்னிப்பானாக. அவனது அன்பிற்குரிய தூதர் முஹம்மது ﷺ அவர்கள்மீது உண்மையான அன்பால் எமது இதயங்களை நிரப்புவானாக.
اللَّهُمَّ صَلِّ وَسَلِّمْ وَبَارِكْ عَلَى سَيِّدِنَا مُحَمَّدٍ ﷺ
ரஸூலுல்லாஹ் ﷺ அவர்களின் நூர், அவர்களின் உயரிய பண்புகளின் ஒளி மற்றும் அவர்களின் புனிதமான சுன்னாவின் மணம் எமது இதயங்களையும், இல்லங்களையும், சமூகங்களையும், எமது நாட்டையும் ஒளிரச் செய்யட்டும்.
இந்தப் புனிதமான மீலாதுன் நபி ﷺ நாளில், ஒவ்வொரு இதயத்திலும் அமைதி நிலவட்டும்; ஒவ்வொரு இல்லத்திலும் இரக்கம் நுழையட்டும்; ஒவ்வொரு சமூகத்தையும் அன்பு ஒன்றிணைக்கட்டும்; இலங்கை ஒரே ஒற்றுமையான, நல்லிணக்கமிக்க தேசமாக முன்னேறட்டும்.
மீலாதுன் நபி முபாரக்! 
எங்கள் அன்பிற்கினிய நபி முஹம்மது ﷺ அவர்கள்மீதும், அவர்களின் புனித குடும்பத்தினர்மீதும், தோழர்கள்மீதும், மறுமை நாள் வரை அவர்களின் அருள்மிகு பாதையை உண்மையுடன் பின்பற்றுவோர் அனைவர்மீதும் அல்லாஹ்வின் அளவற்ற அருளும், ஆசீர்வாதங்களும், அமைதியும் பொழியட்டும்.
ஆமீன் யா ரப்பல் ஆலமீன். 
