2015ஆம் ஆண்டுக்குப் பின்னர் சுகாதாரச் சேவையின் அங்கீகரிக்கப்பட்ட பணியாளர் வெற்றிடங்கள் முழுமையாக மீளாய்வு செய்யப்பட்டு சரிசெய்யப்படாததால், ஒட்டுமொத்த சுகாதாரச் சேவையும் சரிந்து விழும் அபாயத்தை எதிர்கொண்டுள்ளதாக அரசு வைத்திய அதிகாரிகள் சங்கம் (GMOA) எச்சரித்துள்ளது.
இலங்கையின் சுகாதாரச் சேவை பல தசாப்தங்களாக குறைந்த செலவில் உயர்ந்த செயல்திறனை வெளிப்படுத்தி சர்வதேச பாராட்டைப் பெற்றிருந்த போதிலும், தற்போதைய நிர்வாக மற்றும் கொள்கை ரீதியான பிரச்சினைகளால் கடும் நெருக்கடியை எதிர்கொண்டுள்ளதாக GMOA ஊடக அறிக்கையொன்றில் தெரிவித்துள்ளது.
சுகாதாரப் பணியாளர்களை உரிய எண்ணிக்கையிலும் தரத்திலும் பேணுவதற்காக, பொதுவாக ஐந்து வருடங்களுக்கு ஒருமுறை பணியாளர் வெற்றிடங்கள் மீளாய்வு செய்யப்பட வேண்டும். எனினும், நாடு முழுவதையும் உள்ளடக்கிய இறுதி முழுமையான பணியாளர் மீளாய்வு 2015ஆம் ஆண்டிலேயே இடம்பெற்றுள்ளதாக சங்கம் சுட்டிக்காட்டியுள்ளது.
கடந்த ஒரு தசாப்தத்தில் வைத்தியசாலைகளுக்கு வரும் நோயாளிகளின் எண்ணிக்கை, அறுவைச் சிகிச்சைகள், ஏனைய மருத்துவ நடைமுறைகள் மற்றும் பரிசோதனைகளின் எண்ணிக்கை கணிசமாக அதிகரித்துள்ள போதிலும், பழைய பணியாளர் வரம்புகளே தொடர்ந்தும் பயன்படுத்தப்படுவதாக GMOA தெரிவித்துள்ளது.
மேலும், புதிய வைத்தியசாலைகள் மற்றும் சுகாதாரப் பிரிவுகள் உருவாக்கப்பட்டுள்ளதுடன், சிகிச்சை முறைகளின் சிக்கல்தன்மையும் புதிய தொழில்நுட்பங்களின் பயன்பாடும் அதிகரித்துள்ளன. எனினும், இவை அனைத்தும் 2015ஆம் ஆண்டின் அங்கீகரிக்கப்பட்ட பணியாளர் வரம்புகளின் அடிப்படையிலேயே முன்னெடுக்கப்படுவதாக சங்கம் குறிப்பிட்டுள்ளது.
இதனால் வைத்தியர்கள் உள்ளிட்ட சுகாதாரப் பணியாளர்களை புதிதாக இணைத்துக்கொள்வதிலும் கடும் பாதிப்பு ஏற்பட்டுள்ளதாக GMOA தெரிவித்துள்ளது. குறிப்பாக, கடந்த பொருளாதார நெருக்கடியின்போது கணிசமான எண்ணிக்கையிலான வைத்தியர்கள் நாட்டை விட்டு வெளியேறியதால், சுகாதாரத் துறையில் ஆயிரக்கணக்கான வைத்தியர்களுக்கான பற்றாக்குறை ஏற்பட்டுள்ளதாகவும் சங்கம் சுட்டிக்காட்டியுள்ளது.
இந்த நிலைமை தொடர்பில் சுகாதார அமைச்சுடன் தொடர்ச்சியாக பேச்சுவார்த்தைகள் நடத்தப்பட்ட போதிலும், இதுவரை சாதகமான பதில் கிடைக்கவில்லை என GMOA தெரிவித்துள்ளது.
சுகாதாரப் பணியாளர்களின் எண்ணிக்கையை நிர்ணயிப்பதற்காக உலக சுகாதார அமைப்பினால் ஏற்றுக்கொள்ளப்பட்ட அறிவியல் ரீதியான முறைகள் காணப்படுகின்ற போதிலும், இலங்கையின் சுகாதார அமைச்சு அவ்வாறான முறையான நடைமுறையைப் பின்பற்றுவதாகத் தெரியவில்லை எனவும் சங்கம் குறிப்பிட்டுள்ளது.
இது தொடர்பில் இரண்டு வாரங்களுக்கு முன்னர் தகவல் அறியும் உரிமைச் சட்டத்தின் (RTI) கீழ் தகவல் கோரிய போதிலும், இதுவரை சாதகமான பதில் கிடைக்கவில்லை எனவும் GMOA தெரிவித்துள்ளது.
தற்போதைய அரசாங்கம் முன்மொழியும் சுகாதார மறுசீரமைப்புகள் மற்றும் புதிய திட்டங்களை வெற்றிகரமாக நடைமுறைப்படுத்துவதற்கு போதுமான பயிற்சி பெற்ற பணியாளர்கள் அவசியம் என்பதால், சுகாதாரப் பணியாளர் வெற்றிடங்களை உடனடியாக மீளாய்வு செய்து சரிசெய்யுமாறு அதிகாரிகளிடம் GMOA கோரிக்கை விடுத்துள்ளது.
