கொழும்பில் உள்ள ஐந்து நட்சத்திர ஹோட்டலான கிங்ஸ்பரிக்குச் சென்றமை மற்றும் முன்னாள் அமைச்சர் சரத் வீரசேகரவைச் சந்தித்தமை தொடர்பாக முன்வைக்கப்படும் விமர்சனங்களுக்குப் பலாங்கொடை கஸ்ஸப தேரர் விளக்கமளித்துள்ளார்.
வணக்கத்திற்குரிய கலகொட அத்தே ஞானசார தேரரை விடுதலை செய்யக் கோரி முன்னெடுக்கப்பட்ட போராட்டத்தில் பங்கேற்ற போது கடுமையாக நோய்வாய்ப்பட்டதால், தங்குமிட வசதியையும் மருத்துவ சிகிச்சையையும் பெற்றுக்கொள்ள வேண்டிய நிலை ஏற்பட்டதாக அவர் தெரிவித்துள்ளார்.
சமூக ஊடகங்களில் பரவி வரும் குற்றச்சாட்டுகளுக்குப் பதிலளித்த அவர், போராட்டத்தில் பங்கேற்றிருந்த போது தனக்கு அதிக காய்ச்சல் ஏற்பட்டதாகவும், சிகிச்சை பெறுவதற்கு ஏற்ற இடத்திற்குச் செல்லுமாறு பக்தர்கள் அறிவுறுத்தியதாகவும் குறிப்பிட்டுள்ளார்.
இதற்கு முன்னரும் பல பக்தர்கள் தங்குமிட வசதிகளை வழங்க முன்வந்தபோதிலும், அவர்களின் அழைப்புகளைத் தான் நிராகரித்து வந்ததாகவும், உடல்நிலை மோசமடைந்த பின்னரே அந்த உதவியை ஏற்றுக்கொண்டதாகவும் அவர் தெரிவித்துள்ளார்.
இதற்கமைய, இறுதியில் கொழும்பிலுள்ள கிங்ஸ்பரி ஹோட்டலில் தங்குவதற்கான அழைப்பை ஏற்றுக்கொண்டதாகவும், அங்கு மருத்துவக் குழுவினர் வருகை தந்து சிகிச்சை வழங்கியதாகவும் அவர் விளக்கமளித்துள்ளார்.
தங்குமிடத்திற்கான செலவுகளையும் மருத்துவச் செலவுகளையும் வெவ்வேறு பக்தர்கள் ஏற்றுக்கொண்டதாகத் தெரிவித்த அவர், நோய்வாய்ப்பட்ட ஒரு பிக்குவுக்கு உதவுவதற்காகப் பலர் ஒன்றிணைந்து இந்த ஏற்பாடுகளைச் செய்ததாகக் குறிப்பிட்டுள்ளார்.
சரத் வீரசேகரவின் வருகை தொடர்பில் கேள்வி
முன்னாள் அமைச்சர் சரத் வீரசேகர ஹோட்டலுக்கு வருகை தந்தமை தொடர்பான விமர்சனங்களுக்குப் பதிலளித்த கஸ்ஸப தேரர், தான் நோய்வாய்ப்பட்டிருந்தபோது சரத் வீரசேகர தன்னைப் பார்ப்பதற்காக வந்ததை உறுதிப்படுத்தியுள்ளார்.
“நான் நோய்வாய்ப்பட்டிருந்தபோது சரத் வீரசேகர என்னைப் பார்ப்பதற்கு வந்தார். அது தடை செய்யப்பட்ட ஒன்றா? என்னைப் பார்ப்பதற்கு ஒருவருக்கு அனுமதி தேவையா?” என அவர் கேள்வி எழுப்பியுள்ளார்.
முன்னாள் அமைச்சர் அங்கிருந்து புறப்படுவதற்கு முன்னர் தனது உடல்நிலை குறித்து விசாரித்ததாகவும், அவரது வருகை அரசியல் நோக்கம் கொண்டது என்ற குற்றச்சாட்டுகளைத் தான் நிராகரிப்பதாகவும் அவர் தெரிவித்துள்ளார்.
பக்தர்களின் உதவிகளைப் பெற்றுக்கொள்வது குறித்து விளக்கம்
பக்தர்களிடமிருந்து தங்குமிட வசதிகள் உள்ளிட்ட உதவிகளைப் பெற்றுக்கொண்டமை தொடர்பான விமர்சனங்களுக்கும் பதிலளித்த கஸ்ஸப தேரர், பௌத்த மரபில் பிக்குகளுக்கு உணவு, ஆடை, கட்டடங்கள், காணிகள் மற்றும் ஏனைய வசதிகளைத் தானமாக வழங்கும் நடைமுறை நீண்டகாலமாக இருந்து வருவதாகக் குறிப்பிட்டுள்ளார்.
அத்துடன், ஹோட்டலின் கண்காணிப்புக் கமராவில் பதிவான காட்சிகளும், தனது தங்குமிட ஏற்பாடுகள் தொடர்பான தனிப்பட்ட தகவல்களும் வெளியிடப்பட்டதாகக் கூறப்படும் விடயம் குறித்தும் அவர் கேள்வி எழுப்பியுள்ளார்.
இதற்குப் பின்னர் ஹில்டன் ரெசிடென்சஸில் மேற்கொள்ளப்பட்ட முன்பதிவு தொடர்பான தகவல்களும், அதனை மேற்கொண்ட நபரின் விபரங்களும் வெளியிடப்பட்டதாக அவர் தெரிவித்துள்ளார்.
இத்தகைய தகவல்களை வெளியிடுவது தனியுரிமையை மீறும் பாரதூரமான செயல் எனக் குறிப்பிட்ட அவர், தனது தனிப்பட்ட பாதுகாப்பு குறித்தும் கவலை வெளியிட்டுள்ளார்.
கொழும்பு நீதிமன்ற வளாகத்திற்குள் பாதாள உலகக் குழு உறுப்பினரான கணேமுல்ல சஞ்சீவ சுட்டுக்கொல்லப்பட்ட சம்பவத்தைச் சுட்டிக்காட்டிய அவர், முக்கியமான தனிப்பட்ட தகவல்கள் பகிரங்கப்படுத்தப்படும் சூழலில் தனிநபர்களின் பாதுகாப்பு எவ்வாறு உறுதிப்படுத்தப்படும் என்றும் கேள்வி எழுப்பியுள்ளார்.
மேலும், சமூக ஊடகங்களில் தன்னை இலக்கு வைத்து விமர்சிப்பவர்களைக் கண்டித்துள்ள அவர், ஆளும் கட்சியின் ஆதரவாளர்கள் போராட்டத்தைப் பலவீனப்படுத்த முயற்சிப்பதாகவும் குற்றஞ்சாட்டியுள்ளார்.
சத்தியாக்கிரகப் போராட்டம் தற்காலிகமாக இடைநிறுத்தம்
இதற்கிடையில், வணக்கத்திற்குரிய கலகொட அத்தே ஞானசார தேரரை விடுதலை செய்யக் கோரி கொழும்பு விகாரமகாதேவி பூங்காவில் முன்னெடுக்கப்பட்ட சத்தியாக்கிரகப் போராட்டம் ஒக்டோபர் 25ஆம் திகதி தற்காலிகமாக இடைநிறுத்தப்பட்டது.
பௌத்தத்தின் மூன்று பிரதான பீடங்களின் மகாநாயக்க தேரர்கள் விடுத்த அறிவித்தலைத் தொடர்ந்து இந்தத் தீர்மானம் எடுக்கப்பட்டது. ஞானசார தேரரின் விடுதலை தொடர்பில் அரசாங்கத்துடன் கலந்துரையாடி தலையிடுவதாக அவர்கள் தெரிவித்திருந்தனர்.
பிக்குகளின் உடனடி நோக்கம் மகாநாயக்க தேரர்களிடம் ஒப்படைக்கப்பட்டுள்ளதாகக் குறிப்பிட்ட பலாங்கொடை கஸ்ஸப தேரர், அரசாங்கத்திற்கு எதிரான அரசியல் பிரசாரத்தை அடிமட்டத்திலிருந்து ஆரம்பிக்க வேண்டும் என்றும் அழைப்பு விடுத்துள்ளார்.
