தேசிய நெடுஞ்சாலைகளை அகலப்படுத்தி மேம்படுத்தும் திட்டம் மற்றும் டித்வா (Ditwah) சூறாவளியினால் சேதமடைந்த வீதிகளைப் புனரமைக்கும் வேலைத்திட்டம் ஆகியவற்றின் கீழ், சுமார் 9.1 பில்லியன் ரூபா பெறுமதியான நான்கு ஒப்பந்தங்களை வழங்குவதற்கு அமைச்சரவை அங்கீகாரம் வழங்கியுள்ளது.
இதற்கமைய, தேசிய நெடுஞ்சாலைகளின் பல்வேறு பகுதிகளை அகலப்படுத்தி மேம்படுத்துதல் மற்றும் சேதமடைந்த வீதி உட்கட்டமைப்புகளைப் புனரமைத்தல் ஆகிய பணிகள் முன்னெடுக்கப்படவுள்ளன.
தேசிய நெடுஞ்சாலைகளை அகலப்படுத்தி மேம்படுத்தும் திட்டத்தின் கீழ், கொழும்பு – இரத்தினபுரி – வெல்லவாய – மட்டக்களப்பு வீதியின் (A004) 62+450 கிலோமீற்றர் முதல் 70+000 கிலோமீற்றர் வரையான பகுதியை அபிவிருத்தி செய்வதற்காக 1,485.79 மில்லியன் ரூபா பெறுமதியான ஒப்பந்தம் RR Construction (Pvt) Ltd நிறுவனத்திற்கு வழங்கப்பட்டுள்ளது.
அதேநேரம், பெல்மதுளை – எம்பிலிப்பிட்டிய – நோனகம வீதியின் (A018) 15+000 கிலோமீற்றர் முதல் 30+000 கிலோமீற்றர் வரையான பகுதியை மேம்படுத்துவதற்காக 3,739.84 மில்லியன் ரூபா பெறுமதியான மற்றுமொரு ஒப்பந்தமும் அதே நிறுவனத்திற்கு வழங்கப்பட்டுள்ளது.
மேலும், பேராதனை – பதுளை – செங்கலடி வீதியின் (B365) 3+000 கிலோமீற்றர் முதல் 10+040 கிலோமீற்றர் வரையான பகுதியை அபிவிருத்தி செய்வதற்காக 3,106.21 மில்லியன் ரூபா பெறுமதியான ஒப்பந்தம் Maga Engineering (Pvt) Ltd நிறுவனத்திற்கு வழங்கப்பட்டுள்ளது.
இதற்கிடையில், டித்வா சூறாவளியினால் சேதமடைந்த வீதிகளைப் புனரமைக்கும் திட்டத்தின் கீழ், நாவலப்பிட்டி பிரதேசத்திலுள்ள வீதிப் பகுதிகளைப் புனரமைத்து மேம்படுத்துவதற்காக 763.98 மில்லியன் ரூபா பெறுமதியான ஒப்பந்தம் ELS Construction (Pvt) Ltd நிறுவனத்திற்கு வழங்கப்பட்டுள்ளது.
இதன்படி, தேசிய நெடுஞ்சாலை அபிவிருத்திக்கான மூன்று ஒப்பந்தங்களின் மொத்தப் பெறுமதி சுமார் 8.33 பில்லியன் ரூபாவாகும். சூறாவளியினால் சேதமடைந்த வீதிகளைப் புனரமைப்பதற்கான ஒப்பந்தத்தின் பெறுமதி 763.98 மில்லியன் ரூபாவாகும்.
இதற்கமைய, பெறுமதி சேர் வரி (VAT) தவிர்த்து, நான்கு ஒப்பந்தங்களினதும் மொத்தப் பெறுமதி சுமார் 9.10 பில்லியன் ரூபாவாகும்.
தேசிய போட்டிமுறை கொள்முதல் நடைமுறையின் கீழும், உரிய உயர்மட்ட கொள்முதல் குழுக்களின் பரிந்துரைகளுக்கு அமைவாகவும் குறைந்த விலையில் தகைமைகளைப் பூர்த்தி செய்த ஒப்பந்ததாரர்கள் தெரிவுசெய்யப்பட்டதாக அரசாங்கம் தெரிவித்துள்ளது.
குறித்த ஒப்பந்தங்களை வழங்குவதற்காக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் சமர்ப்பித்த யோசனைகளுக்கு அமைச்சரவை அங்கீகாரம் வழங்கியுள்ளது.
