உயிர்த்த ஞாயிறு பயங்கரவாதத் தாக்குதல்கள் தொடர்பில் குற்றவாளிகளாகத் தீர்ப்பளிக்கப்பட்ட மூவர், உண்மையான குற்றவாளிகள் இன்னும் சுதந்திரமாக இருப்பதாகத் தெரிவித்த கருத்துகள் தொடர்பில் குற்றப் புலனாய்வுத் திணைக்களம் (CID) விசாரணைகளை ஆரம்பித்துள்ளது.
குறித்த மூவரும் உயிர்த்த ஞாயிறு தாக்குதல்கள் தொடர்பில் மூன்று நீதிபதிகளைக் கொண்ட மேல் நீதிமன்ற அமர்வினால் குற்றவாளிகளாகத் தீர்ப்பளிக்கப்பட்டவர்கள் என மேலதிக சொலிசிட்டர் ஜெனரல் திலீப பீரிஸ், புதன்கிழமை (21) கோட்டை நீதவான் நீதிமன்றத்தில் தெரிவித்தார்.
தாங்கள் சிறைக்கு அனுப்பப்படுகின்ற போதிலும், உண்மையில் தாக்குதல்களுடன் தொடர்புடையவர்கள் இன்னும் சுதந்திரமாக இருப்பதாக அவர்கள் தெரிவித்துள்ளனர்.
இந்தக் கருத்துகள் பாரதூரமானவை எனச் சுட்டிக்காட்டிய மேலதிக சொலிசிட்டர் ஜெனரல், மில்ஹான், ரிஸ்கான் மற்றும் ஸைனுல் அப்தீன் ஆகிய மூவரிடமும் சிறைக்குச் சென்று வாக்குமூலங்களைப் பதிவு செய்வதற்கு CID அதிகாரிகள் எட்டுப் பேருக்கு அனுமதி வழங்குமாறு நீதிமன்றத்தைக் கோரினார்.
உயிர்த்த ஞாயிறு தாக்குதல்கள் தொடர்பான விசாரணைகளைத் திசைதிருப்பியதாகக் கூறப்படும் குற்றச்சாட்டில், அரச புலனாய்வுச் சேவையின் முன்னாள் பணிப்பாளர் ஓய்வுபெற்ற மேஜர் ஜெனரல் சுரேஷ் சலே உள்ளிட்ட மூன்று சந்தேகநபர்களுக்கு எதிரான வழக்கு கோட்டை நீதவான் பசன் அமரசேன முன்னிலையில் விசாரணைக்கு எடுத்துக்கொள்ளப்பட்ட போதே இந்த விடயங்கள் தெரிவிக்கப்பட்டன.
விசாரணைகள் துரிதப்படுத்தப்பட்டுள்ளன
விசாரணைகளின் முன்னேற்றம் தொடர்பில் நீதிமன்றத்தில் அறிக்கையிட்ட மேலதிக சொலிசிட்டர் ஜெனரல் திலீப பீரிஸ், முன்னர் மந்தகதியில் இடம்பெற்ற விசாரணைகள் தற்போது துரிதப்படுத்தப்பட்டுள்ளதாகத் தெரிவித்தார்.
கடந்த வாரம் பல முக்கிய சாட்சிகளிடம் வாக்குமூலங்கள் பதிவு செய்யப்பட்டதாகவும், இராணுவப் புலனாய்வுப் பிரிவுக்கு தகவல்களை வழங்கிய மைக்கல் சேவியர் வில்வராசிங்கம் என்ற ராஜன் என்பவரிடமும் வாக்குமூலம் பெறப்பட்டுள்ளதாகவும் அவர் குறிப்பிட்டார்.
ராஜன், சுரங்க என்ற இராணுவக் கோப்ரல் ஒருவருடன் தொடர்பில் இருந்ததாகவும், தீபன் என்பவரின் வீட்டில் இடம்பெறும் நடவடிக்கைகள் தொடர்பில் தகவல்களைச் சேகரிக்குமாறு இராணுவத்தினரால் அறிவுறுத்தப்பட்டதாகவும் நீதிமன்றத்தில் தெரிவிக்கப்பட்டது.
தீபன் என்பவர், உயிர்த்த ஞாயிறு தற்கொலைக் குண்டுதாரியான இன்ஷாப் அஹமட்டின் மாமனாரான வர்த்தகர் அலாவுதீனின் நண்பர் என அடையாளம் காணப்பட்டுள்ளார்.
உயிர்த்த ஞாயிறு தாக்குதல்களுக்கு முன்னர் குறித்த வீட்டுக்குச் சென்றபோது, கறுப்பு புர்கா அணிந்த பெண் ஒருவரையும் மட்டக்களப்பு பிரதேசத்தைச் சேர்ந்தவர்கள் பேசும் தமிழ்ப் பேச்சுவழக்கில் உரையாடிய மற்றுமொரு நபரையும் ராஜன் அவதானித்ததாகத் தெரிவிக்கப்பட்டது.
இந்தத் தகவல்களை ராஜன், கோப்ரல் சுரங்கவிடம் தெரிவித்ததாகவும் நீதிமன்றத்தில் கூறப்பட்டது.
உயிர்த்த ஞாயிறு தாக்குதல்களின் பின்னர் தொலைக்காட்சிச் செய்திகளைப் பார்த்த ராஜன், தான் குறித்த வீட்டில் கண்ட பெண் சாரா ஜஸ்மின் என்பதை அடையாளம் கண்டதாகவும் தெரிவிக்கப்பட்டது.
எனினும், இந்த அடையாளம் தொடர்பில் கோப்ரல் சுரங்கவிடம் தெரிவித்தபோது, அந்த விடயத்தைப் புறக்கணித்து அமைதியாக இருக்குமாறும் சம்பவத்தை மறந்துவிடுமாறும் தனக்கு அறிவுறுத்தப்பட்டதாக ராஜன் கூறியுள்ளார்.
இந்தத் தகவல்கள் வெளிப்படுத்தப்படுவதை சுரேஷ் சலேயின் அறிவுடன் தடுக்க நடவடிக்கை எடுக்கப்பட்டதாக மேலதிக சொலிசிட்டர் ஜெனரல் குற்றஞ்சாட்டினார்.
கருணா அம்மானுக்கு போலி இராஜதந்திர கடவுச்சீட்டு?
முன்னாள் விடுதலைப் புலிகள் அமைப்பின் உறுப்பினரான கருணா அம்மான், பிரித்தானியாவுக்குச் செல்வதற்காக போலியான இராஜதந்திரக் கடவுச்சீட்டைப் பெற்றுக்கொடுக்க சுரேஷ் சலே நடவடிக்கை எடுத்ததாகக் கூறப்படும் குற்றச்சாட்டுகள் தொடர்பிலும் விசாரணைகளில் தகவல்கள் வெளியாகியுள்ளதாக நீதிமன்றத்தில் தெரிவிக்கப்பட்டது.
சலே மற்றும் இராணுவத்துடன் தொடர்புடைய அன்சார் என அடையாளம் காணப்பட்ட மற்றுமொரு நபர் இணைந்து குறித்த கடவுச்சீட்டை ஏற்பாடு செய்ததாக கருணா அம்மான் கூறியுள்ளதாக மேலதிக சொலிசிட்டர் ஜெனரல் தெரிவித்தார்.
சுற்றுச்சூழல் அமைச்சின் செயலாளராக இருந்ததாகக் கூறப்படும் கொகிலா துஷ்மந்த என்ற பெயரில் அந்தக் கடவுச்சீட்டு வழங்கப்பட்டதாகவும், எனினும் அவ்வாறான ஒருவர் இல்லை என விசாரணையாளர்கள் கூறுவதாகவும் தெரிவிக்கப்பட்டது.
பின்னர் கருணா அம்மான் பிரித்தானியாவில் கைது செய்யப்பட்டு சிறையில் அடைக்கப்பட்டதுடன், அதன் பின்னர் இலங்கைக்குத் திருப்பி அனுப்பப்பட்டதாகவும் நீதிமன்றத்தில் குறிப்பிடப்பட்டது.
சுரேஷ் சலேயிடம் பல கடவுச்சீட்டுகள் இருப்பதாகவும் மேலதிக சொலிசிட்டர் ஜெனரல் தெரிவித்தார். இது தொடர்பில் வெளிவிவகார அமைச்சின் ஊடாக மேலதிக விசாரணைகள் முன்னெடுக்கப்படும் என்றும் அவர் குறிப்பிட்டார்.
முன்னாள் அமைச்சர் டக்ளஸ் தேவானந்தாவிடமும் வாக்குமூலம்
உயிர்த்த ஞாயிறு தாக்குதல்கள் தொடர்பான விசாரணைகளின் ஒரு பகுதியாக முன்னாள் அமைச்சர் டக்ளஸ் தேவானந்தாவிடமும் குற்றப் புலனாய்வுத் திணைக்கள அதிகாரிகள் வாக்குமூலம் பதிவு செய்துள்ளனர்.
இந்த விசாரணையில் முக்கிய சாட்சியாகக் கருதப்படும் அசாத் மௌலானாவை கருணா மற்றும் பிள்ளையான் தரப்பினருக்கு அறிமுகப்படுத்தியதில் தேவானந்தாவுக்குத் தொடர்பு இருப்பதாகக் கிடைத்த தகவலின் அடிப்படையில் இந்த வாக்குமூலம் பெறப்பட்டுள்ளது.
குற்றச்சாட்டுகளை நிராகரித்த சுரேஷ் சலேயின் தரப்பு
சுரேஷ் சலே சார்பில் ஆஜரான ஜனாதிபதி சட்டத்தரணி ஷவீந்திர பெர்னாண்டோ, தனது தரப்பினருக்கு எதிராகப் போதிய ஆதாரங்களை முன்வைக்க அரசுத் தரப்பு தவறியுள்ளதாகத் தெரிவித்தார்.
இந்த வழக்கு முழுமையாக வாக்குமூலங்களை அடிப்படையாகக் கொண்டுள்ளதாகக் குறிப்பிட்ட அவர், சலேயிடம் பல கடவுச்சீட்டுகள் இருப்பதாக முன்வைக்கப்படும் குற்றச்சாட்டுகளையும் கேள்விக்குட்படுத்தினார்.
குறித்த கடவுச்சீட்டுகளின் இலக்கங்களை வெளிப்படுத்துவதுடன், அவை எவ்வாறு பெற்றுக்கொள்ளப்பட்டன என்பதையும் விசாரணையாளர்கள் தெளிவுபடுத்த வேண்டும் என அவர் வலியுறுத்தினார்.
கருணா அம்மானுக்கான கடவுச்சீட்டு தயாரிக்கப்பட்டதாகக் கூறப்படும் காலப்பகுதியில் சலே பிரான்ஸில் இருந்ததாகவும், வெளிநாட்டில் இருந்துகொண்டு இலங்கையில் கடவுச்சீட்டை ஏற்பாடு செய்ததாகக் கூறப்படும் குற்றச்சாட்டில் நியாயமில்லை என்றும் அவர் சுட்டிக்காட்டினார்.
கோட்டாபய ராஜபக்ஷ தொடர்பான விசாரணைகள் முன்னேற்றம்
இதற்கிடையில், முன்னாள் ஜனாதிபதி கோட்டாபய ராஜபக்ஷ தொடர்பான விசாரணைகளின் முன்னேற்றம் குறித்தும் நீதவான் பசன் அமரசேன கேள்வி எழுப்பினார்.
இந்த வழக்குடன் தொடர்புடைய வெளிநாட்டுப் பயணத் தடைக்கு உட்பட்டுள்ள கோட்டாபய ராஜபக்ஷ, இதுவரை சந்தேகநபராகப் பெயரிடப்படவில்லை. மருத்துவ சிகிச்சைக்காக வெளிநாடு செல்ல அனுமதிக்கும் வகையில் பயணத் தடையை நீக்குமாறு கோரி அவரது தரப்பில் நீதிமன்றத்தில் மனுவொன்றும் தாக்கல் செய்யப்பட்டுள்ளதாக நீதவான் குறிப்பிட்டார்.
இதற்குப் பதிலளித்த மேலதிக சொலிசிட்டர் ஜெனரல் திலீப பீரிஸ், கோட்டாபய ராஜபக்ஷ தொடர்பான விசாரணைகள் முன்னேற்றமான கட்டத்தை எட்டியுள்ளதாகத் தெரிவித்தார்.
ஏனைய சந்தேகநபர்கள் தொடர்பான விசாரணைகள் தொடர்வதுடன், முன்னாள் ஜனாதிபதி தாக்கல் செய்த வழக்கொன்று மேன்முறையீட்டு நீதிமன்றத்தில் நிலுவையில் இருப்பதாலும் அவர் இதுவரை சந்தேகநபராகப் பெயரிடப்படவில்லை எனவும் விளக்கமளித்தார்.
சிங்கப்பூரிலுள்ள மவுண்ட் எலிசபெத் வைத்தியசாலையில் இதய அறுவைச் சிகிச்சை செய்துகொண்டதைத் தொடர்ந்து, மேலதிக மருத்துவப் பரிசோதனைகள் மற்றும் சிகிச்சைகளுக்காக நவம்பர் மாத நடுப்பகுதி வரை இரண்டு வாரங்களுக்கு வெளிநாடு செல்ல கோட்டாபய ராஜபக்ஷ அனுமதி கோரியுள்ளதாகவும் அவர் தெரிவித்தார்.
முன்னாள் ஜனாதிபதிக்கு வெளிநாட்டில் மருத்துவ சிகிச்சை அவசியமாக இருந்தால், மனிதாபிமான அடிப்படையில் அதற்கான அனுமதியை வழங்க முடியும் என்றும் மேலதிக சொலிசிட்டர் ஜெனரல் குறிப்பிட்டார்.
சுரேஷ் சலேயின் உடல்நிலை குறித்து நீதவான் விசாரணை
இதற்கிடையில், CID காவலில் வைக்கப்பட்டுள்ள சுரேஷ் சலேயை அண்மையில் நேரில் சந்தித்ததாக நீதவான் பசன் அமரசேன தெரிவித்தார்.
இதன்போது, CID அதிகாரிகள் தன்னை நன்றாக நடத்துவதாக சலே தெரிவித்திருந்ததாகவும் நீதவான் குறிப்பிட்டார்.
சலே கோரியிருந்த சில உணவுப் பொருட்கள் அவருக்கு வழங்கப்பட்டுள்ளனவா என நீதவான் வினவியபோது, அதற்கான ஏற்பாடுகள் செய்யப்பட்டுள்ளதாக CID அதிகாரிகள் தெரிவித்தனர்.
சலே சார்பில் ஆஜரான சட்டத்தரணி அசித் சிறிவர்தன, தனது தரப்பினரை வெலிசறை சிறைச்சாலைக்கு மாற்றுவதற்குப் பதிலாக CID காவலில் வைத்திருப்பதே சிறந்தது எனத் தெரிவித்தார்.
மேலும், சலே மருத்துவமனையில் அனுமதிக்கப்பட வேண்டிய நிலை ஏற்பட்டபோது, உடனடியாக மருத்துவ சிகிச்சை பெறுவதற்கு நடவடிக்கை எடுத்த மேலதிக சொலிசிட்டர் ஜெனரலுக்கும் அவர் நன்றி தெரிவித்தார்.
121 நாட்கள் மருத்துவமனையில் அனுமதிக்கப்பட்டிருந்த சலேயின் உடல்நிலை தற்போது மேம்பட்டுள்ளதாகவும், அவர் தொடர்ந்து CID காவலில் இருப்பதாகவும் மேலதிக சொலிசிட்டர் ஜெனரல் நீதிமன்றத்தில் தெரிவித்தார்.
இருதரப்பு சமர்ப்பணங்களையும் பரிசீலித்த கோட்டை நீதவான் பசன் அமரசேன, அரசுத் தரப்பினால் முன்வைக்கப்பட்ட கோரிக்கைகளுக்கு அனுமதி வழங்கியதுடன், விசாரணைகளின் முன்னேற்றம் குறித்து அறிக்கையிடுவதற்காக வழக்கை நவம்பர் 25ஆம் திகதிக்கு ஒத்திவைத்தார்.
