முன்மொழியப்பட்டுள்ள மின்சார ரயில் திட்டத்திற்கு கணிசமான அளவு மின்சாரம் தேவைப்படும் எனவும், எதிர்காலத்தில் இது இலங்கையின் மிகப்பெரிய மின்சார நுகர்வோரில் ஒன்றாக அமையக்கூடும் எனவும் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க இன்று (22) பாராளுமன்றத்தில் தெரிவித்தார்.
மின்சார ரயில் திட்டத்திற்குத் தேவையான மின்சாரத்தைப் பூர்த்தி செய்வது தொடர்பில் எரிசக்தி அமைச்சுடன் கலந்துரையாடல்கள் இடம்பெற்று வருவதாக அமைச்சர் தெரிவித்தார்.
நாட்டில் உற்பத்தி செய்யப்படும் அதிகளவிலான மின்சாரத்தைப் பயன்படுத்தக்கூடிய முக்கிய திட்டங்களில் மின்சார ரயில் திட்டமும் ஒன்றாகக் கருதப்படுவதாக அவர் குறிப்பிட்டார்.
அதேவேளை, நாட்டில் மின்சார உற்பத்தி அதிகரிக்கும் நிலையில், அந்த மின்சாரத்தைப் பயன்படுத்தக்கூடிய தொழிற்துறைகள் மற்றும் ஏனைய திட்டங்களை உருவாக்க வேண்டிய அவசியம் உள்ளதாகவும் அமைச்சர் தெரிவித்தார். இல்லையெனில், உபரி மின்சாரத்தை ஏற்றுமதி செய்ய வேண்டிய நிலை ஏற்படக்கூடும் எனவும் அவர் கூறினார்.
முன்மொழியப்பட்டுள்ள மின்சார ரயில் போன்ற பாரிய திட்டங்களுக்கு ஆதரவளிப்பதற்காக புதுப்பிக்கத்தக்க எரிசக்தி வாய்ப்புகளை அரசாங்கம் ஆராய்ந்து வருவதாகவும் அமைச்சர் பிமல் ரத்நாயக்க தெரிவித்தார்.
