தொடரைக் கைப்பற்றியது பர்ஹான் தலைமையிலான பாகிஸ்தான் அணி!

அப்ரா அன்சார்

கொழும்பு:பாகிஸ்தானுக்கு எதிரான மூன்றாவது மற்றும் இறுதியான T20 சர்வதேசப் போட்டியில் இலங்கை அணி 8 விக்கெட்டுகளால் அபார வெற்றிபெற்றுள்ளது.

எனினும், மூன்று போட்டிகள் கொண்ட T20 தொடரை சாஹிப்சாதா பர்ஹான் தலைமையிலான பாகிஸ்தான் அணி 2–1 என்ற கணக்கில் கைப்பற்றியுள்ளது.

ராவல்பிண்டி கிரிக்கெட் மைதானத்தில் செவ்வாய்க்கிழமை (13) மாலை நடைபெற்ற இப்போட்டியில், முதலில் துடுப்பெடுத்தாடிய பாகிஸ்தான் அணி 20 ஓவர்கள் நிறைவில் 8 விக்கெட்டுகளை இழந்து 168 ஓட்டங்களைப் பெற்றது.

பாகிஸ்தான் அணியின் தலைவர் சாஹிப்சாதா பர்ஹான் 47 பந்துகளில் 7 பவுண்டரிகள், 3 சிக்ஸர்கள் அடங்கலாக 76 ஓட்டங்களைப் பெற்றார். அரஃபாத் மின்ஹாஸ் ஆட்டமிழக்காமல் 34 ஓட்டங்களைப் பெற்றார்.

ஆரம்பத்தில் விக்கெட்டுகளை இழந்து தடுமாறிய பாகிஸ்தான் அணிக்கு பர்ஹான் சிறப்பான பங்களிப்பை வழங்கினார். அவர் இந்தத் தொடரில் தொடர்ச்சியாக மூன்றாவது அரைச்சதத்தையும் பதிவு செய்தார்.

இலங்கை அணியின் பந்துவீச்சில் தசுன் ஷானக 21 ஓட்டங்களுக்கு 3 விக்கெட்டுகளைக் கைப்பற்றினார். நுவான் துஷார மற்றும் எஷான் மலிங்க ஆகியோர் தலா 2 விக்கெட்டுகளைக் கைப்பற்றினர்.

குசல் மெண்டிஸின் அதிரடி ஆட்டம்

169 ஓட்டங்கள் என்ற வெற்றி இலக்குடன் பதிலுக்குத் துடுப்பெடுத்தாடிய இலங்கை அணி, 17.1 ஓவர்களில் 2 விக்கெட்டுகளை மாத்திரம் இழந்து 172 ஓட்டங்களைப் பெற்று வெற்றியை உறுதிசெய்தது.

ஆரம்பத்தில் லஹிரு உதார ஒரு ஓட்டத்துடன் ஆட்டமிழந்தபோதிலும், சினெத் ஜயவர்தன மற்றும் தலைவர் குசல் மெண்டிஸ் ஆகியோர் இணைந்து இரண்டாவது விக்கெட்டுக்காக 59 ஓட்டங்களைப் பகிர்ந்தனர்.

சினெத் ஜயவர்தன 26 பந்துகளில் 5 பவுண்டரிகள், 2 சிக்ஸர்கள் அடங்கலாக 38 ஓட்டங்களைப் பெற்றார்.

அதனைத் தொடர்ந்து குசல் மெண்டிஸ் மற்றும் கமிந்து மெண்டிஸ் ஆகியோர் இணைந்து ஆட்டமிழக்காமல் 98 ஓட்டங்களைப் பகிர்ந்து இலங்கை அணியின் வெற்றியை உறுதிப்படுத்தினர்.

அதிரடியாகத் துடுப்பெடுத்தாடிய குசல் மெண்டிஸ் 48 பந்துகளில் 9 பவுண்டரிகள், 4 சிக்ஸர்கள் அடங்கலாக ஆட்டமிழக்காமல் 87 ஓட்டங்களைப் பெற்றார்.

கமிந்து மெண்டிஸ் 27 பந்துகளில் 40 ஓட்டங்களைப் பெற்று ஆட்டமிழக்காமல் களத்தில் இருந்தார்.

போட்டியின் சிறந்த வீரர் குசல் மெண்டிஸ்

இப்போட்டியின் சிறந்த வீரராக இலங்கை அணியின் குசல் மெண்டிஸ் தெரிவுசெய்யப்பட்டார். தொடரின் சிறந்த வீரராக பாகிஸ்தான் அணியின் சாஹிப்சாதா பர்ஹான் தெரிவுசெய்யப்பட்டார்.

தொடரின் முதல் இரண்டு போட்டிகளிலும் ஒக்டோபர் 9ஆம் திகதி 4 விக்கெட்டுகளாலும், ஒக்டோபர் 11ஆம் திகதி 82 ஓட்டங்களாலும் பாகிஸ்தான் அணி வெற்றிபெற்றிருந்தது. இதன் மூலம் இறுதிப் போட்டிக்கு முன்னரே தொடரைக் கைப்பற்றியிருந்தது.

இதனையடுத்து, இலங்கை, பாகிஸ்தான் மற்றும் இங்கிலாந்து அணிகள் பங்கேற்கும் ஒருநாள் முத்தரப்புத் தொடர் எதிர்வரும் ஒக்டோபர் 18ஆம் திகதி ராவல்பிண்டியில் ஆரம்பமாகவுள்ளது.

இத்தொடரின் இறுதிப் போட்டி ஒக்டோபர் 31ஆம் திகதி லாகூரிலுள்ள கடாபி மைதானத்தில் நடைபெறவுள்ளது.

போட்டியின் சுருக்கம்

பாகிஸ்தான் – 168/8 (20 ஓவர்கள்)
சாஹிப்சாதா பர்ஹான் – 76
அரஃபாத் மின்ஹாஸ் – ஆட்டமிழக்காமல் 34
தசுன் ஷானக – 3/21
நுவான் துஷார – 2/38
எஷான் மலிங்க – 2/38

இலங்கை – 172/2 (17.1 ஓவர்கள்)
குசல் மெண்டிஸ் – ஆட்டமிழக்காமல் 87
கமிந்து மெண்டிஸ் – ஆட்டமிழக்காமல் 40
சினெத் ஜயவர்தன – 38
மொஹமட் இம்ரான் – 1/31
அரஃபாத் மின்ஹாஸ் – 1/26

முடிவு: இலங்கை 8 விக்கெட்டுகளால் வெற்றி.
போட்டியின் சிறந்த வீரர்: குசல் மெண்டிஸ் (இலங்கை)
தொடரின் சிறந்த வீரர்: சாஹிப்சாதா பர்ஹான் (பாகிஸ்தான்)