மேற்கிந்திய தீவுகள் அணியின் தலைவர் ஷாய் ஹோப், இருதரப்பு டி20 சர்வதேசத் தொடர்களில் அதிக ஓட்டங்களைப் பெற்ற அணித் தலைவர்கள் பட்டியலில் இரண்டாவது இடத்தைப் பிடித்து புதிய மைல்கல்லை எட்டியுள்ளார்.
இந்தியா – மேற்கிந்திய தீவுகள் அணிகளுக்கு இடையிலான ஐந்து போட்டிகள் கொண்ட டி20 சர்வதேசத் தொடர் 2-2 என்ற கணக்கில் சமநிலையில் நிறைவடைந்தது.
பெங்களூருவில் நடைபெறவிருந்த தொடரின் கடைசிப் போட்டி மழை காரணமாகக் கைவிடப்பட்டது.
இந்தத் தொடரில் அபாரமாக விளையாடிய ஷாய் ஹோப், நான்கு இன்னிங்ஸ்களில் 261 ஓட்டங்களைக் குவித்து, அதிக ஓட்டங்களைப் பெற்ற வீரராகத் திகழ்ந்ததுடன், தொடர் நாயகன் விருதையும் வென்றார்.
ராஞ்சியில் நடைபெற்ற இரண்டாவது டி20 போட்டியிலும், ஐதராபாத்தில் நடைபெற்ற நான்காவது டி20 போட்டியிலும் அவர் சதமடித்து அசத்தினார்.
குறிப்பாக, நான்காவது போட்டியில் ஆட்டமிழக்காமல் 102 ஓட்டங்களைப் பெற்ற அவரது ஆட்டம், மேற்கிந்திய தீவுகள் அணியின் வெற்றிக்கு முக்கியப் பங்காற்றியது.
இதற்கு முன்னர், இந்திய அணியின் தலைவர் சூர்யகுமார் யாதவ், 2025ஆம் ஆண்டு நியூசிலாந்துக்கு எதிரான டி20 தொடரில் ஐந்து இன்னிங்ஸ்களில் 242 ஓட்டங்களைப் பெற்றிருந்தார்.
இந்நிலையில், 261 ஓட்டங்களைக் குவித்துள்ள ஷாய் ஹோப், சூர்யகுமார் யாதவைப் பின்தள்ளி, இருதரப்பு டி20 சர்வதேசத் தொடர்களில் அதிக ஓட்டங்களைப் பெற்ற அணித் தலைவர்கள் பட்டியலில் இரண்டாவது இடத்துக்கு முன்னேறியுள்ளார்.
இந்தப் பட்டியலில் பாகிஸ்தான் அணியின் முன்னாள் தலைவர் பாபர் அசாம் முதலிடத்தில் உள்ளார். அவர் 2022ஆம் ஆண்டு இங்கிலாந்துக்கு எதிரான டி20 தொடரில் ஏழு இன்னிங்ஸ்களில் 285 ஓட்டங்களைப் பெற்றிருந்தார்.
பாபர் அசாமின் சாதனையை முறியடிக்க ஷாய் ஹோப்புக்கு மேலும் 24 ஓட்டங்கள் தேவைப்பட்டன. எனினும், கடைசிப் போட்டி மழையால் கைவிடப்பட்டதால் அந்தச் சாதனையை முறியடிக்கும் வாய்ப்பு அவருக்குக் கிடைக்கவில்லை.
இதன்படி, இருதரப்பு டி20 சர்வதேசத் தொடர்களில் அதிக ஓட்டங்களைப் பெற்ற அணித் தலைவர்கள் பட்டியலில் பாபர் அசாம் 285 ஓட்டங்களுடன் முதலிடத்திலும், ஷாய் ஹோப் 261 ஓட்டங்களுடன் இரண்டாவது இடத்திலும், சூர்யகுமார் யாதவ் 242 ஓட்டங்களுடன் மூன்றாவது இடத்திலும் உள்ளனர்.
