வண. கலகொட அத்தே ஞானசார தேரருக்கு உடனடியாக ஜனாதிபதி மன்னிப்பு வழங்கப்பட வேண்டும் என ஐக்கிய தேசியக் கட்சி (ஐ.தே.க.) கோரிக்கை விடுத்துள்ளது.
மூன்று பிரதான பௌத்த பீடங்களின் மகாநாயக்க தேரர்களின் தலையீட்டுடன் இந்தப் பிரச்சினைக்குத் தீர்வு காண அரசாங்கம் நடவடிக்கை எடுக்க வேண்டும் என்றும் அக்கட்சி வலியுறுத்தியுள்ளது.
ஒக்டோபர் 26ஆம் திகதி வெளியிட்ட அறிக்கையிலேயே ஐக்கிய தேசியக் கட்சி இந்தக் கோரிக்கையை முன்வைத்துள்ளது.
ஞானசார தேரரை விடுதலை செய்யக் கோரி முன்னெடுக்கப்பட்ட சத்தியாக்கிரகப் போராட்டம், மகாநாயக்க தேரர்களின் அறிவுறுத்தலுக்கு அமையத் தற்காலிகமாக இடைநிறுத்தப்பட்டுள்ளதாக அந்த அறிக்கையில் குறிப்பிடப்பட்டுள்ளது.
நீதிமன்ற அவமதிப்புக் குற்றத்திற்காக அதிகபட்சமாக 18 மாத சிறைத்தண்டனையே விதிக்க முடியும் என முன்னாள் பிரதம நீதியரசர் சரத் என். சில்வா தெரிவித்துள்ள கருத்தையும் ஐக்கிய தேசியக் கட்சி சுட்டிக்காட்டியுள்ளது.
மேலும், குறித்த குற்றத்திற்காக ஞானசார தேரர் ஏற்கனவே 10 மாதங்களுக்கும் அதிகமான காலம் சிறைத்தண்டனை அனுபவித்துள்ளதாகவும் அக்கட்சி குறிப்பிட்டுள்ளது.
மகாநாயக்க தேரர்களின் கோரிக்கைக்கு அமைய முன்னதாகவும் ஞானசார தேரருக்கு ஜனாதிபதி மன்னிப்பு வழங்கப்பட்டிருந்ததை ஐக்கிய தேசியக் கட்சி நினைவுபடுத்தியுள்ளது.
அத்துடன், ஞானசார தேரருக்கு மீண்டும் ஜனாதிபதி மன்னிப்பு வழங்குவது குறித்து பரிசீலிக்க முடியும் என உச்ச நீதிமன்றமும் தனது தீர்ப்பில் சுட்டிக்காட்டியுள்ளதாக அக்கட்சி தெரிவித்துள்ளது.
ஞானசார தேரரை விடுதலை செய்யக் கோரிய பேரணி அல்லது சத்தியாக்கிரகப் போராட்டத்தில் பங்கேற்காத பௌத்த பிக்குகளுக்கு எதிராகவும் அரசாங்கம் நீதிமன்ற உத்தரவுகளைப் பெற்றுள்ளதாக ஐக்கிய தேசியக் கட்சி விமர்சித்துள்ளது.
இத்தகைய நடவடிக்கைகள் பாரிய தவறுகள் எனக் குறிப்பிட்டுள்ள அக்கட்சி, ஞானசார தேரரின் காவி ஆடையை அகற்றுவதற்கு உத்தரவிட்டவர்களை அடையாளம் கண்டு விசாரணை நடத்த வேண்டும் என்றும் கோரியுள்ளது.
எனவே, தற்போதைய சர்ச்சைக்கு முற்றுப்புள்ளி வைக்கும் வகையில், மூன்று பிரதான பௌத்த பீடங்களின் மகாநாயக்க தேரர்களின் தலையீட்டுடன் ஞானசார தேரருக்கு உடனடியாக ஜனாதிபதி மன்னிப்பு வழங்க அரசாங்கம் நடவடிக்கை எடுக்க வேண்டும் என ஐக்கிய தேசியக் கட்சி வலியுறுத்தியுள்ளது.
