SLPP நாடாளுமன்ற உறுப்பினர் நாமல் ராஜபக்சவை கைது செய்வதற்கு வழிவகுத்த வழக்கு, தற்போதைய அரசாங்கத்தினால் தாக்கல் செய்யப்பட்டதல்ல என அமைச்சர் விஜித ஹேரத் இன்று தெரிவித்துள்ளார். இந்த வழக்கு ரணில் விக்கிரமசிங்க ஜனாதிபதியாக இருந்த காலத்திலேயே தாக்கல் செய்யப்பட்டதாக அவர் குறிப்பிட்டார்.
இன்று நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில் கருத்து தெரிவித்த அமைச்சர், தற்போதைய அரசாங்கம் ஆட்சிக்கு வருவதற்கு முன்னரே இந்த வழக்கு ஆரம்பிக்கப்பட்டதாக வலியுறுத்தினார்.
“இது எங்களால் தாக்கல் செய்யப்பட்ட வழக்கு அல்ல. ரணில் விக்கிரமசிங்கவின் காலத்திலேயே முன்னதாக தாக்கல் செய்யப்பட்டது. அவர் இதை மறந்துவிட்டார் போல் தெரிகிறது” என விஜித ஹேரத் தெரிவித்தார்.
மேலும், முந்தைய அரசாங்கம் இந்த வழக்கு தொடர்பில் முறையான விசாரணைகள் அல்லது நீதிமன்ற நடவடிக்கைகளை முன்னெடுக்கத் தவறியதாகவும், இது “அவர்களுக்கு இடையிலான ஒரு உடன்பாடு” எனவும் அமைச்சர் குற்றஞ்சாட்டினார்.
தற்போதைய அரசாங்கம் ஆட்சிக்கு வந்த பின்னர், இதுவரை புறக்கணிக்கப்பட்டிருந்த அனைத்து வழக்குகளும் நீதிமன்றத்தில் விசாரிக்கப்படுவதற்குத் தேவையான வசதிகளை ஏற்படுத்தியதாகவும் அவர் மேலும் தெரிவித்தார்.
