வைத்தியர் எம். எச். எம். ஹஸ்ஸான் அவர்கள், கொழும்பு தேசிய வைத்தியசாலையின் இருதய சிகிச்சை பிரிவில் சிரேஷ்ட பதிவாளராக நியமனம்

வைத்தியர் எம். எச். எம். ஹஸ்ஸான் அவர்கள், கொழும்பு தேசிய வைத்தியசாலையின் (NHSL) இருதய சிகிச்சை (Cardiology) பிரிவில் சிரேஷ்ட பதிவாளராக (Senior Registrar) நியமிக்கப்பட்டுள்ளார். அண்மையில் நடைபெற்ற வைத்திய கலாநிதி (MD) பரீட்சையில் வெற்றிகரமாக சித்தியடைந்ததன் மூலம், அவர் இந்த உயரிய பதவி உயர்வைப் பெற்றுள்ளார். குறிப்பிடத்தக்க வகையில், இம்முறை இந்தப் பரீட்சையில் இலங்கையிலிருந்து இரண்டு முஸ்லிம் வைத்தியர்களே சித்தியடைந்துள்ளனர்.

துறைசார் ஆழமான அறிவு, வளமான அனுபவம், விடாமுயற்சி மற்றும் நோயாளி பராமரிப்பிற்கான உயரிய அர்ப்பணிப்பு ஆகியவற்றால், வைத்தியர் எம். எச். எம். ஹஸ்ஸான் அவர்கள் சிறந்த இளம் மருத்துவ நிபுணராக திகழ்ந்து வருகிறார்.
அவர் தனது ஆரம்பக் கல்வியை பேருவளை ஹெரோ சர்வதேச பாடசாலையில் பெற்றதுடன், சாதாரண தரம் (O/L) வரை கொழும்பு ஹெரோ சர்வதேச பாடசாலையில் கல்வி கற்றார். பின்னர், நுகேகொட லைசியம் சர்வதேச பாடசாலையில் உயர்தர (A/L) கல்வியை தொடர்ந்தார்.
தனது வைத்தியராகும் கனவினை நனவாக்கும் நோக்கில், கொழும்பிலுள்ள தென் ஆசிய தொழில்நுட்ப மற்றும் மருத்துவ நிறுவனம் (SAITM) இல் பயின்று MBBS பட்டம் பெற்றார். அங்கு அவர் முதல் தரம் – தங்கப் பதக்கம் (First Class Gold Medalist) பெற்று சித்தியடைந்தது, அவரது கல்வித் திறமையையும் கடின உழைப்பையும் வெளிப்படுத்தும் சிறப்பான சாதனையாகும்.
தொழில்முறை பயணத்தின் முதல் கட்டமாக, வைத்தியர் எம். எச். எம். ஹஸ்ஸான் அவர்கள் புத்தளம் தள வைத்தியசாலையில் தனது மருத்துவ இன்டர்ன்ஷிப் (Internship) பயிற்சியை நிறைவு செய்து, பரபரப்பான சுகாதார சூழலில் மதிப்புமிக்க மருத்துவ அனுபவத்தை பெற்றார். அதனைத் தொடர்ந்து, மன்னார் மாவட்ட பொது வைத்தியசாலையில் இன்டர்ன்ஷிப் பிந்தைய சேவையை (Post Internship Service) மேற்கொண்டு, வளங்கள் குறைந்த அந்தப் பிரதேசத்தில் நோயாளிகளுக்கு சிகிச்சை அளிப்பதில் குறிப்பிடத்தக்க பங்களிப்பை வழங்கினார்.

2022 ஆம் ஆண்டு நடைபெற்ற வைத்திய கலாநிதி பகுதி 1 (MD Part 1) பரீட்சையில் வெற்றி பெற்று, ஸ்ரீ ஜெயவர்தனபுர பொது வைத்தியசாலையில் மருத்துவ பதிவாளராக (Medical Registrar) நியமிக்கப்பட்டார். தொடர்ந்து, வைத்திய கலாநிதி பகுதி 2 (MD Part 2) பரீட்சையையும் வெற்றிகரமாக நிறைவு செய்து, பட்டமேற்படிப்பு மருத்துவப் பயிற்சியில் ஒரு முக்கிய மைல்கல்லை எட்டியுள்ளார்.

வைத்தியத் துறையில் தானே சாதனை புரிந்ததுடன் மட்டுமல்லாது, தனது சகோதரர் எம். எச். எம். அம்ஜத் அவர்களும் வைத்தியராக உருவாகுவதற்கு ஊக்கமளிக்கும் முன்மாதிரியாக வைத்தியர் ஹஸ்ஸான் அவர்கள் திகழ்ந்துள்ளார்.
வைத்தியர் எம். எச். எம். ஹஸ்ஸான் அவர்கள், பேருவளையைச் சேர்ந்த அல்ஹாஜ் ஹுஸைன் ஷரீப் மற்றும் ஹாஜியாணி ஸல்மியா ஸலீம் ஆகியோரின் சிரேஷ்ட புதல்வர் ஆவார்.