வத்தளை, ஹெகித்த, அல்விஸ்வத்த பகுதியில் கூரிய ஆயுதங்களால் தாக்கப்பட்டு ஒருவர் கொல்லப்பட்டுள்ளார்.
குறித்த நபரின் வீட்டில் நேற்று (19) இரவு இந்தக் கொலை இடம்பெற்றுள்ளதாக பொலிஸார் தெரிவிக்கின்றனர்.
முகமூடி அணிந்த நான்கு பேர் முச்சக்கர வண்டியில் குறித்த நபரின் வீட்டிற்கு வந்து கூர்மையான ஆயுதங்களால் தாக்கி குறித்த நபரை கொலை செய்துள்ளதாக பொலிஸார் தெரிவித்தனர்.
கொலை இடம்பெற்ற போது உயிரிழந்தவரின் மனைவி மற்றும் இரண்டு குழந்தைகளும் வீட்டில் இருந்தனர்.
உயிரிழந்தவர் கொழும்பு 15 இல் வசிக்கும் 43 வயதுடையவர் என்பதுடன், சில மாதங்களுக்கு முன்பு அந்தப் பகுதியில் ஒரு வீட்டை வாடகைக்கு எடுத்து தனது மனைவி மற்றும் இரண்டு குழந்தைகளுடன் வசித்து வந்ததாகக் கூறப்படுகிறது.
பொலிஸாரால் நடத்தப்பட்ட ஆரம்ப விசாரணைகளில், இறந்தவர் 2023 ஆம் ஆண்டு மஹாபாகே பகுதியில் ஒருவர் சுட்டுக் கொல்லப்பட்ட சம்பவத்திற்கு உதவிய மற்றும் உடந்தையாக இருந்த நபர் என்பது தெரியவந்துள்ளது.
இந்த சம்பவம் தொடர்பாக எந்த சந்தேக நபர்களும் கைது செய்யப்படவில்லை, மேலும் வத்தளை பொலிஸ் நிலையம் மற்றும் களனி பிரிவு குற்றப் புலனாய்வுப் பிரிவு இது தொடர்பான மேலதிக விசாரணைகளை ஆரம்பித்துள்ளன.
