ஐ. ஏ. காதிர் கான்
ஏழு மூளைகளைக் கொண்டவர்கள் என நாட்டையே வங்குரோத்தாக்கிய காக்கைகளும் மைனாக்களும் மீண்டும் எழுச்சி பெற கடும் பிரயத்தனம் எடுத்து வருகின்றனர் என, எதிர்க்கட்சித் தலைவரும் ஐக்கிய மக்கள் சக்தியின் தலைவருமான சஜித் பிரேமதாஸ குற்றஞ்சாட்டினார்.
பியகம பிரதேசத்தில் (17) ஞாயிற்றுக்கிழமை இடம்பெற்ற மக்கள் சந்திப்பில் கலந்து கொண்டு உரையாற்றும் போதே, எதிர்க்கட்சித் தலைவர் சஜித் பிரேமதாச மேற்கண்டவாறு தெரிவித்தார்.
ஐக்கிய மக்கள் சக்தி, ஏனைய கட்சிகளைப் போல் ஊடகங்களில் வந்து கோப்புகளைக் காட்டி பொய்ப் படம் காட்டாது என்றும், நாட்டை வங்குரோத்தடையச் செய்தவர்களை நடை முறையில் சட்டத்தின் முன் எப்போதோ நிரூபித்து விட்டதாகவும், எதிர்க்கட்சித் தலைவர் இங்கு வலியுறுத்தினார்.
நாட்டின் வங்குரோத்து நிலையால் வறுமை 30 இலட்சத்திலிருந்து 70 இலட்சமாக அதிகரித்திருக்கும் நேரத்தில், வறிய மக்களுக்கு நிவாரணம் வழங்குவதற்கான முறையான வேலைத்திட்டம் எதுவும் அரசாங்கத்திடம் இல்லை என்றும் எதிர்க்கட்சித் தலைவர் குற்றம் சுமத்தினார்.
தேர்தலின் போது மக்களுக்கு அதிகாரம் வழங்கப்படுவதாகக் கூறப்பட்டாலும், ஆட்சிக்கு வந்த பின் அரசியல்வாதிகளே தீர்மானங்களை எடுக்கின்றனர் என்றும், இந்நிலையை மாற்ற வேண்டிய தருணம் வந்துள்ளதாகவும், கிராமத்திலும் நகரத்திலும் முடிவெடுக்கும் அதிகாரத்தை இளைஞர்களுக்கு வழங்குவதே ஐக்கிய மக்கள் சக்தி அரசாங்கத்தின் இலக்கு எனவும் எதிர்க்கட்சித் தலைவர் தெரிவித்தார்.
ஐக்கிய மக்கள் சக்தி அரசாங்கத்தில் இளைஞர்களுக்கும் பெண்களுக்கும் முடிவெடுக்கும் உரிமை வழங்கப்படும் அதிகாரம் அளிக்கப்படும் என்றும், நாட்டில் சிறு வயது முதலே கல்வியை மேம்படுத்த வேண்டும் என்றும் அவர் தெரிவித்தார்.
பிரபஞ்சம், மூச்சுத் திட்டங்களை எதிர்க்கட்சி செயல்படுத்தியபோது, அரசாங்கம் சேறு பூசும் செயற்பாடுகளை முன்னெடுத்தாலும், ஐக்கிய மக்கள் சக்திக்கு பெறப்பட்ட ஒவ்வொரு நிதியும் வங்குரோத்து நிலையில் உள்ள நாட்டின் சுகாதாரம் மற்றும் கல்வி முறையை மேம்படுத்தவே பயன்படுத்தப்பட்டுள்ளதாகவும், எதிர்க்கட்சித் தலைவர் தெரிவித்தார்.
15 சத வீதத்தில் இருந்து 18 சத வீதமாக பெறுமதி சேர் வரியை (வற்) அதிகரித்து, நாட்டையே வங்குரோத்தாக்கிய ஜனாதிபதியின் எடுபிடிக் கூட்டங்கள் மீண்டும் எழுச்சி பெற முயல்கின்றனர் என்றும், நாட்டை வங்குரோத்தாக்கிய மொட்டுத் தரப்புடன் இணைந்து கொண்டு நாட்டைக் கட்டியெழுப்ப முடியாது என்பதாலேயே இந்தப் பொறுப்பை ஏற்க தாம் விருப்பம் தெரிவிக்கவில்லை என்றும், எனினும் தனது தலைமையிலான ஐக்கிய மக்கள் சக்தி தருணம் வரும்போது மக்கள் ஆணையுடனேயே நாட்டைப் பொறுப்பேற்கும் என்றும் எதிர்க்கட்சித் தலைவர் இங்கு உறுதிபடத் தெரிவித்தார்.
