வீழ்ச்சியடைந்த நாட்டை மறுமலர்ச்சிக்கு அழைத்து செல்லும் யுகம் ஆரம்பமாகியுள்ளதாக ஜனாதிபதி அநுர குமார திசாநாயக்க தெரிவித்துள்ளார்.
பதுளை பிரதேசத்தில் இடம்பெற்ற மக்கள் பேரணியில் கலந்து கொண்டு உரையாற்றிய போதே அவர் இதனைக் குறிப்பிட்டுள்ளார்.
இந்த பயணத்தை யாராலும் தடுக்க முடியாது என்றும், நாட்டை கட்டியெழுப்புவதற்கான பல திட்டங்கள் தயாரிக்கப்பட்டுள்ளதாகவும் ஜனாதிபதி இதன்போது சுட்டிக்காட்டியுள்ளார்.
“எமது நாட்டை டிஜிட்டல் மயமாக்குவதற்கான திட்டத்தை நாங்கள் தயாரித்துள்ளோம்.
இதுவரை இலங்கைக்கு அதிக சுற்றுலாப் பயணிகள் வருகை தந்த ஆண்டாக 2025 ஆம் ஆண்டை நாம் மாற்றுவோம்.
எமது தூய்மையான இலங்கை வேலைத்திட்டம் ஆரம்பிக்கப்படவுள்ளது.
இலங்கையை பிராந்தியத்தில் தூய்மையான நாடாக, தூய்மையான கழிவறை அமைப்புடன், ஒழுக்கத்துடன், நன்னடத்தையுடன், குப்பைகள் இல்லாத மிக தூய்மையான இலங்கையாக மாற்றுவதற்கு நாங்கள் உழைத்து வருகிறோம்.
புதிய அறிவியல் மற்றும் ஆராய்ச்சி மையத்தைத் திறக்க வேண்டும்.
மூடப்பட்ட தொழிற்சாலைகளை மீண்டும் திறக்கவும், எங்களின் வளங்களைப் பயன்படுத்தி புதிய தொழிற்சாலைகளை உருவாக்கவும் திட்டங்களைத் தயாரித்துள்ளோம்.
சரிந்த நாட்டை மறுமலர்ச்சிக்கு அழைத்து செல்லும் யுகத்தை தேசிய மக்கள் சக்தி தொடங்கியுள்ளது. இந்தப் பயணத்தை யாராலும் தடுக்க முடியாது.”
எமது அரசாங்கத்திற்கு இருந்த முதலாவது சவாலான பொருளாதாரத்தை ஒழுங்கான முறையில் முகாமைத்துவப்படுதில் நாம் வெற்றி கண்டுள்ளதாக ஜனாதிபதி அநுர குமார திசாநாயக்க இங்கு தெரிவித்தார்.
“நாங்கள் ஆட்சியைப் பிடித்தபோது, நாட்டை சாதாரண நிலைமைகளின் கீழ் இயக்கும் முக்கிய நெருக்கடி எங்களுக்கு இருந்தது.
நாம் கண்டறிந்தது மிக ஆழமான பொருளாதார நெருக்கடியை எதிர்கொள்ளும் ஒரு நாடு, எனவே, இந்த பொருளாதாரத்தின் மீதான உடனடி பெரிய தாக்கங்களை இந்த பொருளாதாரத்தால் தாங்க முடியாது.
எனவே, பொருளாதாரத்தை வீழ்ச்சியடையச் செய்யாமல், பொருளாதாரத்தில் ஈடுபட்டுள்ள சமூகங்களின் நம்பிக்கையைப் பெற்று சாதாரண நிலையை உருவாக்குவதே எமது திட்டமாக இருந்தது.
அதில் நாம் வெற்றி கண்டோம். சரியான திட்டங்களை வகுத்து டொலரை 300க்கு கீழே வைத்தோம்.
பொருளாதாரம் சரியாமல் தொடர்ந்து செல்வதுதான் முதல் சவால். அதை நாங்கள் செய்தோம்…” என்றார்.
